Kawasaki kompaniyasi yangi robotik transport vositasi – Corleo’ni taqdim etdi. Bu haqda Daily Mail nashri ma’lum qildi.
Unga ko‘ra, ushbu gidrogen bilan ishlaydigan, to‘rt oyoqli, ikki kishilik kvadruped mashina har qanday yerda yugurish imkoniyatiga ega. Corleo odatiy g‘ildiraklar o‘rniga robotik oyoqlar bilan jihozlangan bo‘lib, boshqarish uchun tanani harakatlantirish kifoya. Qurilma minuvchining harakatlarini doimiy ravishda kuzatib boradi, bu esa xavfsizlikni ta’minlashga yordam beradi.
Kawasaki Corleo’ni 2050-yil uchun konsept sifatida ishlab chiqdi. U gidrogen generatori bilan ishlaydi, natijada faqat toza suv chiqindisi hosil bo‘ladi. Qurilma turli yerlarda yurishga moslashadigan oyoq tuzilmasiga ega, shuningdek, optimal boshqarish uchun sensorlar bilan jihozlangan. Corleo kelajakda off-road transport vositasi sifatida katta imkoniyatlar yaratishi kutilmoqda.
Eslatib o‘tamiz, avvalroq Marsni inson yashashi uchun moslashtirish rejasi haqida yozgan edik.
