Vivo kompaniyasining subbrendi iQOO ikki yangi model — iQOO Z10 va iQOO Z10x smartfonlarini taqdim etdi. Ikkala qurilma ham katta sigʻimli akkumulyatorlari bilan ajralib turadi.
iQOO Z10 modeli 7300 mA·soat sigʻimli akkumulyator bilan jihozlangan boʻlib, shunga qaramay uning qalinligi bor-yoʻgʻi 7,9 mm, ogʻirligi esa 199 grammni tashkil etadi. Qurilma 90 Vt tezkor quvvatlash va 7,5 Vt teskari quvvatlash funksiyalarini qoʻllab-quvvatlaydi.
Smartfon kuchli Snapdragon 7s Gen 3 protsessori, 12 GB operativ va 256 GB ichki xotira, shuningdek, Sony IMX882 asosiy sensoriga ega kameraga ega. Ekran — 6,77 dyuymli OLED, Full HD+ aniqlikda, 120 Gs yangilanish chastotasiga ega.
Qurilma Funtouch OS 15 (Android 15 asosida) operatsion tizimida ishlaydi. Kompaniya 2 yil davomida Android yangilanishlari va 3 yil xavfsizlik yangilanishlarini kafolatlamoqda.
iQOO Z10x esa budjetga mosroq model boʻlib, 6500 mA·soatli akkumulyator, MediaTek Dimensity 7300 chipi, 6,72 dyuymli IPS ekran, 8 GB operativ va 256 GB ichki xotira bilan taʼminlangan. Ushbu model 44 Vt tezkor quvvatlash funksiyasiga ega va Z10 kabi yangilanish kafolatlariga ega.
Narxlar ham foydalanuvchilar uchun jozibali:
- iQOO Z10 — $255;
- iQOO Z10x — $162.
Yangi modellar kuchli texnik xususiyatlari va katta sigʻimli akkumulyatorlari bilan bozorda katta qiziqish uygʻotishi kutilmoqda.
Avvalroq Kursiv Uzbekistan Vivo X200s smartfonining imkoniyatlari ma’lum qilingani haqida xabar bergan edi.
