Bahorda qayerga oilaviy sayohatga chiqish mumkin? Bahor — bu tabiat uyg‘onadigan, havo iliqlashadigan, gullar ochiladigan va yuraklarda sayohat qilish ishtiyoqi uyg‘onadigan fasl. Ayniqsa, O‘zbekistonning tog‘li hududlari bahorda o‘zgacha go‘zallikka burkanadi. Kursiv Uzbekistan Ekoturizm va ovchilikni rivojlantirish departamenti ma’lumotlari asosida sayohat qilish mumkin bo‘lgan manzillarni va taxminiy xarajatlarni jamladi.
Bu maqolada siz quyidagilarni bilib olasiz:
1. Bo‘ritog‘ — tog‘lar aro sokinlik
Bo‘ritog‘ — Toshkent viloyatining Bo‘stonliq tumanida joylashgan, mamlakatdagi eng tinch, xotirjam va tabiati go‘zal maskanlardan biridir. Bu maskan bahor kelishi bilan yashillikka burkanadi, qushlar sayrasi tog‘ bag‘rida yangraydi, lolazorlar ochilib, atrofga g‘aroyib hid taratadi. Ayniqsa, Bo‘ritog‘ning yengil shamollari, tiniq osmoni va buloqlari sayohatchining ruhini tetiklashtiradi.
Bu yerda tog‘ bag‘rida yurishlar, chiroyli manzara fonida suratga tushish, oila davrasida piknik qilish uchun juda qulay imkoniyatlar mavjud. Bo‘ritog‘ tabiatni sevuvchilar uchun ayni muddao — hech qanday shovqin yo‘q, faqat tabiat va siz. Tabiat qo‘ynida tunashni xohlovchilar uchun kichik mehmon uylari yoki chodir tikib qolish imkoniyati ham bor.
Ushbu manzilning joylashuvi . Bu yerga turli xil yo‘llar bilan yetib borsa bo’ladi. «Pushkin» metro yaqinidagi Salar bekatidan elektr poyezdda Xojikentga qadar kishi boshiga 10 ming so‘m to’lab boriladi. Xojikent bekatidan oilaviy 70 – 100 ming so’m evaziga taksi buyurtma qilish mumkin. Shuningdek, Toshkent markazidan ko’rsatilgan manzilga qadar 250 ming so’m evaziga to’g’ridan-to’g’ri taksi buyurtma qilish mumkin. Piknik uyushtirish xarajatlari bilan birgalikda umumiy maksimal summa 550–600 ming so‘mni tashkil etadi.
2. Burchmulla — qadimiylik va tabiat uyg‘unligi
Burchmulla qishlog‘i ham Bo‘stonliq tumanida joylashgan bo‘lib, uzoq tarixga ega qadimiy madaniyat bilan boyitilgan, ayni paytda go‘zal tabiati bilan ham mashhur. Bahor kelgach, bu yer yam-yashil maydonlarga, gullarga, mevali daraxtlarga to‘ladi. Burchmullada nafis arxitektura izlari, qadimiy masjidlar, eski savdo yo‘llari izlarini uchratish mumkin. Bu esa sayohatchiga nafaqat tabiat, balki tarix bag‘rida sayr qilish imkonini ham beradi.
Bahorda Burchmullaga borgan odam sokinlikni, samimiy xalq mehmondo‘stligini, tog‘-vodiylarning shifobaxsh havosini to‘la-to‘kis his qiladi. Bu yerda daryo bo‘yida dam olish, ot minish, piyoda yurishlar, tabiiy mevalardan bahramand bo‘lish mumkin.
Ushbu manzilning joylashuvi. Bu joy Bo‘ritog‘ning yaqinida joylashgan. Yetib borish xarajatlari yuqoridagi manzil bilan teng narxda.
3. Chimyon — tog‘lar etagidagi bahor
Chimyon — O‘zbekistonning eng mashhur tog‘li dam olish maskanlaridan biri. Qishin-yozin sayyohlar oqib keladigan bu maskan bahor faslida ayniqsa jozibali bo‘ladi. Qorlar erib, daryochalar shovullab oqadi, har bir daraxt novdasida hayot jo‘sh uradi. Chimyon tog‘lari qushlarning sayrasi, buloqlar shovqini va yashil o‘rmonlar bilan bezanadi.
Bahor Chimyonda faol hordiq uchun eng yaxshi vaqt. Bu yerda siz kvadrosikl minishingiz, yurish sayrlarida qatnashishingiz, zipline yoki arqonli yo‘llardan foydalanishingiz mumkin. Bundan tashqari, Chimyonda joylashgan dam olish uylari va mehmonxonalar sizga zamonaviy qulayliklarni taklif etadi.
Ushbu manzilning joylashuvi. Bu yerga ham Pushkin metro yaqinidagi Salar bekatidan elektr poyezdda Xojikentga qadar kishi boshiga 10 ming so‘m to’lab boriladi. Xojikent bekatidan oilaviy 80 – 100 ming so’m evaziga taksi buyurtma qilish mumkin. Shuningdek, Toshkent markazidan ko’rsatilgan manzilga qadar 240 ming so’m evaziga to’g’ridan-to’g’ri taksi buyurtma qilish mumkin. Bu yerda piknik uyushtirish narxi bilan qo‘shib hisoblaganda umumiy maksimal xarajat 500 – 550 ming so‘mni tashkil etadi.
4. Sijjak — sokinlik istaganlar uchun maskan
Sijjak — yana bir borar joyki, Bo‘stonliqning yuragida joylashgan, xuddi tabiatning bag‘rida yashiringan xazinadek. Bu yer ham ko‘plab sayyohlar uchun ma’lum va mashhur, ammo hali ham o‘zining beg‘ubor tabiati bilan saqlanib qolgan go‘sha. Sijjakda bahor o‘zini nafaqat havo, balki ruhda ham his qildiradi. Yashil dalalar, gullar, qiyalardan oqayotgan toza suvlari ko‘nglingizni rom qiladi.
Bu maskan ayniqsa oila davrasida yoki yaqin do‘stlar bilan borishga mos joy. Bu yerda qulay uylar, kichik mehmonxonalar mavjud. Siz buloq suvini ichishingiz, tog‘lardan uzumzorlarni tomosha qilishingiz, oddiygina qushlar sayrasi ostida dam olishingiz mumkin.
Ushbu manzilning joylashuvi. Bu manzilga ham turli xil yo‘llar bilan yetib borsa bo’ladi. «Pushkin» metro yaqinidagi Salar bekatidan elektr poyezdda Xojikentga qadar kishi boshiga 10 ming so‘m to’lab boriladi. Xojikent bekatidan oilaviy 100 ming so’m evaziga taksi buyurtma qilish mumkin. Shuningdek, Toshkent markazidan ko’rsatilgan manzilga qadar 280 ming so’m evaziga to’g’ridan-to’g’ri taksi buyurtma qilish mumkin. Bu yerda piknik uyushtirish narxi bilan qo‘shib hisoblaganda umumiy maksimal xarajat 600 ming so‘mni tashkil etadi.
5. Zomin — O‘zbekistonning yashil yuragi
Zomin — Jizzax viloyatining eng mashhur va eng yashil hududi bo‘lib, o‘zining boy tabiati, toza tog‘ havosi va sog‘lomlashtiruvchi muhit bilan mashhur. O‘zbekiston bo‘yicha sayohat qilmoqchi bo‘lganlar uchun Zomin — ayniqsa bahor faslida eng yaxshi tanlovlardan biridir.
Zomin milliy bog‘i — bu yerning eng asosiy diqqatga sazovor joylaridan biri. Bog‘ning umumiy maydoni 26 ming gektardan ortiq bo‘lib, unda minglab daraxt turlari, o‘simliklar, yovvoyi hayvonlar yashaydi. Bahorda bu hudud yashil libosga burkanib, haqiqiy tabiat jannatiga aylanadi. Ayniqsa, yurish (trekking), fotosuratga olish, qushlar sayrasini eshitib hordiq chiqarish uchun juda mos.
Zomin tog‘lari orqali sayohat qilish davomida siz G‘o‘zg‘on, O‘smat, Forish kabi go‘zal hududlardan o‘tasiz. Bu joylarda sayyohlar uchun mehmon uylari, chodir tikish hududlari va hatto zamonaviy dam olish maskanlari ham mavjud. Har yili minglab mahalliy va xorijlik sayyohlar bu yerga dam olish, yurakni tozalash va tabiat qo‘ynida bo‘lish uchun keladi.
Zominga borishda shaxsiy avtomobil eng qulay variant hisoblanadi. Yo‘llar silliq, ammo tog‘li joylarga chiqqanda ehtiyot bo‘lish kerak. Agar ommaviy transportda bormoqchi bo‘lsangiz, Jizzaxdan Forish tomonga qatnovchi avtobuslar orqali ham yetib borishingiz mumkin.
Ushbu manzilning joylashuvi. Toshkent shahridan Afrosiyob poyezdiga har bir kishi uchun 200 ming so‘m evaziga bilet xarid qilib Jizzax shahriga qadar yetib boriladi. Shahar markazidan oilaviy 200 ming so’mga Zomin maskaniga taksi buyurtma qilishingiz mumkin.
Bu yerga aviabilet xarid qilib ham borish mumkin. Toshkent shahridan Zominga qadar har bir kishi uchun 133 ming so’m evaziga yetib borishingiz mumkin. Bu yerda piknik uyushtirish narxi bilan qo‘shib hisoblaganda umumiy maksimal xarajat 1,4 mln so‘mni tashkil etadi.
6. Aydar ko‘li — qumli sahrodagi suv mo‘jizasi
Aydar ko‘li — markaziy O‘zbekistonning Navoiy viloyatida joylashgan, o‘ziga xos ekologik muhitga ega bo‘lgan katta suv ombori. Ushbu ko‘l o‘zining betakror manzarasi, qumli qirg‘og‘i va sahro ichra go‘yoki mo‘jiza bo‘lib turgan suv dunyosi bilan sayohatchilarni o‘ziga rom etadi.
Ko‘l atrofida yovvoyi tabiatni his qilish mumkin: ochiq osmon, kenglik, suv ustida parvoz qilayotgan qushlar, ba’zan cho‘l hayvonlarini ham uchratish mumkin. Aydar ko‘li — bu nafaqat sayr, balki eko-turizm uchun eng yaxshi joylardan biridir. Ayniqsa, bahor faslida bu joy juda jozibali: havo iliq, ko‘l suvi tiniq, va odamlar hali ko‘p bo‘lmaydi — ya’ni sokin dam olish uchun ayni muddao.
Aydar ko‘l bo‘yida siz quyidagi imkoniyatlardan foydalanishingiz mumkin:
- Chodir tikib tunash — yulduzlar ostida uxlash bu yerda o‘zgacha bo‘ladi.
- Qayiqda sayr qilish — ko‘lni yaqinroq ko‘rish va suvdan zavqlanish uchun.
- Qushlarni kuzatish (birdwatching) — ko‘l bo‘yida ko‘plab qush turlari yashaydi.
- Baliq ovlash — bu hudud baliqchilarning sevimli joylaridan biri.
- Foto va video suratga olish — kengliklar, suv sathi va cho‘l manzarasi bilan juda original suratlar olish mumkin.
Aydar ko‘li atrofi biroz chekka hududda joylashgan bo‘lib, eng qulay yo‘l — Navoiy yoki Nurata orqali borishdir. Mashina bilan kelgan ma’qul, sababi ko‘l atrofida jamoat transporti yo‘q. Ammo bu joyga tashrif buyurgan sayohatchilar odatda orqaga qaytishni istamaydi.
Aydar ko‘li yaqinida ba’zi dam olish zonalari mavjud, lekin ularning soni cheklangan, shuning uchun agar uzoq qolmoqchi bo‘lsangiz, oldindan joy band qilgan ma’qul. Ko‘l atrofi toza tutish uchun mehmonlardan ekologik mas’uliyat talab qilinadi.
Ushbu manzilning joylashuvi. Toshkent shahridan Afrosiyob poyezdiga har bir kishi uchun 200 ming so‘m evaziga bilet xarid qilib Jizzax shahriga qadar yetib boriladi. Shahar markazidan oilaviy 150 ming so’mga Aydar ko’liga taksi buyurtma qilishingiz mumkin. Bu yerda piknik uyushtirish narxi bilan qo‘shib hisoblaganda umumiy xarajat 1,3 mln so‘mni tashkil etadi.
Piknik
Tog‘ yon bag‘rida piknik qilish uchun mazali, oson tayyorlanadigan va tashishda qulay bo‘lgan menyuni taqdim etamiz.
Tog‘ piknigi uchun menyu va xarajatlar (4 kishi uchun)
Manba: Toshkentdagi supermarketlarda taxminiy narxlar
Avvalroq Kursiv Uzbekistan Navro‘zda qayerga sayohat qilish mumkinligi haqida yozgan edi.
