Xiaomi yangi avlod aqlli konditsioneri – Mijia Air Conditioner Pro modelini taqdim etdi. Bu haqda Gizmochina nashri ma’lum qildi.
Yangi qurilma inson harakatini aniqlash, energiyani tejash, ekstremal haroratlarda ishlash va aqlli uy tizimlariga ulanish imkoniyatlari bilan ajralib turadi. Uning narxi taxminan $550.
Asosiy xususiyatlari:
Yangi Mijia Pro modeli ikkita mmWave radari orqali real vaqtda inson mavjudligini aniqlaydi. U xonada odam bor-yo‘qligini kuzatib, havo oqimini unga mos ravishda yo‘naltiradi. Agar xona bo‘sh bo‘lsa, qurilma kam quvvat rejimiga o‘tadi, odam qaytganda esa avtomatik tiklanadi. Xiaomi ushbu aqlli boshqaruv tizimi yiliga 361 kVt/soat energiyani tejashini bildiradi.
Sovitish va isitish quvvati:
Mijia konditsioneri ikki silindrli invertorli kompressor va ikki qatlamli kondensator/evaporator tizimi bilan ishlaydi. U -35°C sovuqdan +65°C issiqqacha bo‘lgan haroratda ham samarali sovitish va isitishni ta’minlaydi. Qurilma Xitoydagi eng yuqori APF samaradorlik darajasi – Super Level 1 (5,65 APF) ga ega.
Yordamchi texnologiyalar:
Konditsioner HyperOS Connect, Mi Home ilovasi, va Xiao Ai ovozli yordamchisi bilan integratsiyalashgan. OTA (over-the-air) orqali yangilanishlarni oladi.
Jim va samarali:
Mijia Pro 830 m³/soat havo aylantirish quvvatiga ega, jim rejimda esa atigi 18 dB(A) darajada shovqin chiqaradi. Bu uni deyarli sezilmas holatga keltiradi.
Bu konditsioner nafaqat qulaylik, balki intellektual energiya boshqaruvi va yil davomida ishonchli ishlashni ta’minlaydi. Xiaomi Mijia Air Conditioner Pro – kelajakning salqin va aqlli yechimi bo‘lishi mumkin.
Avvalroq Kursiv Uzbekistan Xiaomi 15 yilligi sharafiga 15S Pro flagmanini taqdim etishi haqida xabar bergan edi.
