Mazda EZ-60 krossoveri yaqin kunlarda rasman namoyish etiladi, biroq uning jihozlari haqida allaqachon to‘liq ma’lumotlar mavjud. Model ayniqsa interyer, media va audio tizimlari jihatidan kompaniyaning boshqa mintaqalar uchun ishlab chiqargan avtomobillaridan sezilarli ustunlikka ega bo‘ladi. Bu haqda Autohome nashri ma’lum qildi.
5K ekran va 23 dinamikli audio tizim
EZ-60 ning salonida haydovchi oldida minimal boshqaruv elementlari bo‘lsa-da, yo‘lovchi tomonida ulkan, 26,45 dyuymli 5K ekran joylashgan. Mashina 23 komponentli 7.1.4 formatdagi ovoz tizimi bilan jihozlanadi. Bu turdagi akustika hozirgacha hatto Mazda’ning AQSh uchun ishlab chiqarilayotgan CX-90 flagmanida ham mavjud emas. Bu borada Mazda Xitoydagi Changan bilan hamkorlikdan katta foyda ko‘rayotgani ko‘rinmoqda.
Krossoverning texnik imkoniyatlari ham zamonaviy
Mazda EZ-60 Changan EPA platformasida ishlab chiqilgan. Uning o‘lchamlari 4850 x 1935 x 1620 mm bo‘lib, g‘ildirak bazasi 2902 mm. Model gibrid sifatida taqdim etiladi: 1,5 litrli atmosferali dvigatel 258 ot kuchiga ega elektr motor bilan birgalikda ishlaydi. Drayv orqa g‘ildiraklarga uzatiladi. Kelajakda to‘liq elektr versiyasi ham taqdim etilishi kutilmoqda. EZ-60ning media va haydovchi yordamchi tizimlari Xitoy avtomobil bozoridagi kuchli raqobatni ta’minlashi mumkin. Shu sababli u premium darajadagi imkoniyatlarni taqdim eta olmoqda.
Avvalroq Kursiv Uzbekistan Mazda 6e xalqaro bozorlar uchun ham ishlab chiqarilishi haqida xabar bergan edi.
