MDH iqtisodiy kengashida sog‘liqni saqlash, transport va sanoat bo‘yicha konsepsiyalar tasdiqlandi
29-aprel kuni Toshkentda o‘tgan MDH Iqtisodiy kengashining 105-majlisida 2030-yilgacha mo‘ljallangan qator strategik hujjatlar, jumladan, sog‘liqni saqlash, havo harakati, yengil va og‘ir sanoat, investitsiyalar, innovatsiyalar bo‘yicha konsepsiyalar tasdiqlandi. Bu haqda Kursiv Uzbekistan muxbiri ma’lum qildi.
Bu voqea O‘zbekiston MDH rahbarlari maslahat uchrashuvidagi raisligi doirasida tashkil etilib, unda O‘zbekiston nomidan bosh vazir o‘rinbosari – Iqtisodiyot va moliya vaziri Jamshid Qo‘chqorov so‘zga chiqdi. Majlisga Tojikiston bosh vazirining birinchi o‘rinbosari Hokim Holiqzoda raislik qildi. Tadbirda Armaniston, Belarus, Rossiya, Qirg‘iziston, Ozarbayjon kabi davlatlardan yuqori martabali vakillar, shuningdek, MDH Bosh kotibi Sergey Lebedev ishtirok etdi.
Shu bilan birga, ekologik xavfsizlik, innovatsiyalarni tijoratlashtirish, yer qa’rini o‘rganish, sog‘liqni saqlash tizimini raqamlashtirish kabi qator yo‘nalishlarda ham aniq choralar belgilandi. Kengash qarorlari asosida MDH davlat rahbarlari va hukumat rahbarlari kengashlariga muhim hujjatlar taqdim etiladi.
Keyingi majlis 2025-yil 18-iyul kuni Moskvada o‘tkazilishi rejalashtirilgan.
Avvalroq Kursiv Uzbekistan Markaziy Osiyo va Yevropa Ittifoqi o‘rtasidagi tovar ayirboshlash hajmi 54 mlrd yevroga yetgani haqida xabar bergan edi.
