Oliy Majlisi Senati tamaki mahsulotlari va nikotin iste’mol qilish uchun mo‘ljallangan qurilmalarning noqonuniy muomalasiga qarshi choralarni kuchaytiruvchi qonunni ma’qulladi. Bu haqda yuqori palata matbuot xizmati xabar berdi.
Qonun bilan Jinoyat kodeksi hamda Ma’muriy javobgarlik to‘g‘risidagi kodeksga o‘zgartishlar kiritilib, taqiqlangan mahsulotlar, xususan, elektron sigaretalar, nikotin yetkazib beruvchi elektron tizimlar, ularning suyuqliklari va tamakini qizdirish qurilmalarining ishlab chiqarilishi, saqlanishi, sotilishi, olib kirilishi va olib chiqilishi uchun ma’muriy hamda jinoiy javobgarlik belgilanmoqda.
Mazkur qonunning 37-moddasida ko‘rsatilishicha, ushbu mahsulotlarni noqonuniy muomalaga kiritgan shaxslar tomonidan huquqbuzarlik aniqlangan taqdirda foydalanilgan mahsulotlar musodara qilinadi va jarima miqdori 37,5 million so‘mdan 75 million so‘mgacha belgilanishi mumkin.
Agar bunday harakatlar ma’muriy jazo qo‘llanilganidan so‘ng yana takrorlansa, 150 milliondan 225 million so‘mgacha jarima yoki 3 yilgacha axloq tuzatish ishlari, hatto 5 yilgacha ozodlikdan mahrum qilish jazosi qo‘llanadi.
Rasmiy bayonotda aytilishicha, bunday vositalarni ixtiyoriy topshirib, bu haqida huquqni muhofaza qiluvchi organlarga xabar bergan shaxslar javobgarlikdan ozod qilinishi mumkin.
Avvalroq Kursiv Uzbekistan yanvar oyida Oliy Majlis fraksiyasi tamaki va nikotin mahsulotlarining muomalasiga oid qonun loyihasini muhokama qilayotgani haqida yozgandi.
