Huawei kompaniyasi o‘zining ilk HarmonyOS operatsion tizimi bilan ishlaydigan kompyuterini taqdim etdi. Bu qurilma MateBook Pro noutbuki bo‘ldi. Bu haqda Huawei Central nashri xabar berdi.
Huawei tomonidan taqdim etilgan yangi qurilmaning korpusi mat teksturaga ega bo‘lib, rang sxemasi esa kulrang-ko‘k. Orqa panelda Huawei’ning kumush rangli logotipi joylashgan.
MateBook Pro o‘ng yuqori burchakda joylashgan tugmachani o‘z ichiga oladi, bu tugma faqat yoqish tugmasi emas, balki barmoq izi skaneri sifatida ham ishlaydi. Qurilma USB-C porti orqali 140 Vt quvvatda zaryad olishni qo‘llab-quvvatlaydi.
Shuningdek, noutbuk Huawei smartfonlarini ulab, ma’lumotlarni uzatish imkonini beradi va Windows tizimidagi qurilmalardan ma’lumotlarni import qilishni ham qo‘llab-quvvatlaydi. Qurilmada o‘rnatilgan AI-assistent Celia foydalanuvchilarga taqdimotlar yaratish, uchrashuvlarni umumlashtirish, hujjatlardan ma’lumotlarni olish va ilovalar bilan o‘zaro aloqada bo‘lish imkonini beradi.
HarmonyOS tizimi bilan ishlaydigan MateBook Pro hozirda RedNote, Bilibili va Feishu kabi ilovalarni qo‘llab-quvvatlaydi. Kelajakda bu ro‘yxat 2000 dan ortiq ilovalarni o‘z ichiga olishi mumkin.
MateBook Pro noutbukining rasmiy savdosi 19-mayda boshlanadi va shu vaqtgacha qurilmaning qo‘shimcha texnik xususiyatlari e’lon qilinishi kutilmoqda.
Avvalroq Kursiv Uzbekistan Dell kompaniyasi 19 soat ishlovchi noutbuklarini namoyish etgani haqida yozgandi.
