O‘zbekiston Markaziy Osiyoda yashil vodorodning birinchi generatsiyasini may oyining oxirida ishga tushiradi
May oyining oxirida Chirchiqda Markaziy Osiyoda birinchi bo‘lib yashil vodorodning sanoat generatsiyasi boshlanadi. Mamlakat mintaqada kashshof bo‘lib, iqtisodiyotni karbonsizlashtirish sari qadam qo‘yadi. Bu haqda Kursiv Uzbekistan muxbiri ma’lum qildi.
Loyiha davlat-xususiy sheriklik shaklida amalga oshirilmoqda. «ACWA Power UKS Green H2 LLC» qo‘shma korxonasining 80 foizi «ACWA Power,» 20 foizi «UzKimyoSanoat» davlat kompaniyasiga tegishli.
«Biz uchun bu muhim imkoniyat. O‘zbekiston mintaqada birinchi bo‘lib bunday loyihaga start bermoqda. Bu kelajak sari qadamdir», – dedi ACWA Power vakili Jon Zaidi Uzbekistan Energy Week – UEW 2025 forumi davomida.
Yashil vodorod quyosh va shamol energiyasi yordamida ishlab chiqarilgan ekologik toza yonilg‘idir. Ammo texnologiya qimmatligicha qolmoqda: tannarx bir barrel neft narxidan bir necha baravar yuqori.
Energetika vaziri o‘rinbosari Umid Mamadaminov yuqori narxga qaramay mamlakat bunday tashabbuslarni qo‘llab-quvvatlashda davom etishini ta’kidladi.
«Bir paytlar quyosh energiyasi ham qimmatga tushardi. Ammo texnologiyalar rivojlanmoqda va vodorod yanada arzonlashadi», – dedi u.
ACWA Power kompaniyasi vakilining fikricha, O‘zbekiston loyihasi butun mintaqa uchun namuna bo‘lishi va mamlakatga yashil energiya sohasida imtiyozli eksport bozorlariga chiqish imkonini berishi mumkin.
