O‘zbekiston Professional futbol ligasi 27-may kuni poytaxtdagi «Bunyodkor» stadionida bo‘lib o‘tadigan mamlakat Superkubogi uchun chipta sotuvining boshlanganini e’lon qildi. Sovrin uchun «Andijon» va «Nasaf» jamoalari kurashadi.
Chiptalarni «Bunyodkor» stadioni, «Humo Arena» kassalaridan hamda iTicket.uz platformasida onlayn tarzda xarid qilish imkoniyati mavjud. Qo‘shimcha ravishda chiptalarning bir qismi Andijon va Qarshida – «Bobur Arena» va «Markaziy» stadion kassalarida sotuvga qo‘yiladi. Biroq Superliganing 11-tur o‘yinlari 23-may kuni o‘tkazilishi sababli, ushbu shaharlarda chiptalar 24 va 25-may kunlari sotuvga chiqariladi.
Tashkilotchilar soxta chiptalarga qarshi kurashish chora-tadbirlariga alohida e’tibor qaratdi. iTicket.uz orqali sotib olingan elektron chiptalar egalari ularni «Bunyodkor» va «Humo Arena» kassalarida qog‘oz chiptalarga almashtirishi shart. Shuningdek, 71 207 10 71 va 71 207 20 72 raqamlari orqali platforma vakillariga murojaat qilib, chiptalarni yetkazib berish xizmatidan foydalanish mumkin.
Elektron chiptalar nusxalari orqali takroran o‘tish holatlarini bartaraf etish maqsadida stadionga faqat qog‘oz chiptalar orqali kirishga ruxsat etiladi. Ushbu qaror kirish tartibotining xavfsizligi va shaffofligini ta’minlash uchun qabul qilingan.
Chipta narxlari quyidagi toifalarga bo‘lingan:
CIP-sektorlar – 200 000 so‘m;
1A, 1B, 1E, 1F sektorlar – 100 000 so‘m;
Qolgan barcha sektorlar – 50 000 so‘m.
Toshkent shahridagi kassalar har kuni soat 10:00 dan 20:00 gacha ochiq bo‘ladi. Andijon va Qarshidagi kassalarning ish vaqti chiptalar mavjudligiga bog‘liq. Zarurat tug‘ilganda 24-25-may kunlari hududiy kassalarga qo‘shimcha chiptalar yetkazib berilishi mumkin.
Muhim: PFL chiptalarni faqat rasmiy savdo nuqtalaridan sotib olishni va qo‘lda yoki ishonchsiz onlayn-maydonchalardan xarid qilmaslikni qat’iy tavsiya etadi.
Avvalroq Kursiv Uzbekistan Yurgen Klopp Shomurodovga murabbiy bo‘lmasligi haqida xabar bergan edi.
