S&P Oʻzbekistonning suveren kredit reytingini «Ijobiy»ga koʻtardi
S&P Global Ratings xalqaro reyting agentligi Oʻzbekistonning suveren kredit reytingi boʻyicha prognozini «barqaror»dan «ijobiy»ga oʻzgartirdi. Shu bilan birga, xorijiy va milliy valyutadagi uzoq va qisqa muddatli reytinglar «BB-/B» darajasida tasdiqlandi.
Prognozning qayta koʻrib chiqilishi barqaror iqtisodiy oʻsish sur’atlari, tarkibiy islohotlarning faol amalga oshirilishi, jumladan, energiya tariflari va hukumatning fiskal konsolidatsiyaga intilishi bilan bogʻliq.
«Davom etayotgan islohotlar hamda oltinning qulay narxlari eksport hajmi, budjet daromadlari va makroiqtisodiy barqarorlikni qo‘llab-quvvatlashi kutilmoqda», – deyiladi agentlik bayonotida.
Prognozni qayta koʻrib chiqish omillari
- Oʻzbekiston yuqori investitsion talabni namoyish etmoqda: investitsiyalar darajasi YIMning qariyb 33 foizini tashkil etadi.
- 2025 – 2028-yillarda real YIMning kutilayotgan oʻrtacha yillik oʻsishi 5,6 foizni tashkil etadi.
- 2023-yil oktabr oyida boshlangan gaz va elektr energiyasi tariflarining oshirilishi budjetga subsidiya yukini kamaytirishi kerak.
- Fiskal taqchillikni 2023-yildagi 4,9 foizdan yalpi ichki mahsulotning 3 foizigacha kamaytirish rejalashtirilgan.
- Budjetning nominal daromadlari 2024-yilda tovarlar eksportining 38 foizini tashkil etgan oltinning yuqori narxlari bilan ham qoʻllab-quvvatlanmoqda.
Reytingning oshishiga nima olib kelishi mumkin
S&P reytingni islohotlarni yanada ilgari surish, davlat korxonalari ustidan nazoratni yaxshilash, iqtisodiy oʻsishga zarar yetkazmagan holda budjet va tashqi taqchillikni kamaytirish orqali oshirish mumkinligini koʻrsatmoqda.
Ehtimoliy xatarlar
Tashqi iqtisodiy vaziyat yomonlashganda, budjet taqchilligi oshganda yoki iqtisodiy oʻsish sekinlashganda, masalan, samarasiz investitsiya loyihalari tufayli prognoz pasayishi mumkin.
Oʻzbekistonning munosabati
«Bunday baho jahon moliya hamjamiyatining Oʻzbekistonda prezident rahbarligida amalga oshirilayotgan islohotlarga ishonchi ortib borayotganidan dalolat beradi va tanlangan yoʻlning toʻgʻriligini tasdiqlaydi», – deya ushbu xabarga izoh berdi Oʻzbekiston prezidenti yordamchisi Saida Mirziyoyeva.
U mamlakatning suveren kredit reytingini oshirish boʻyicha ishchi guruh rahbari sifatida har qanday yutuqni nafaqat saqlab qolish, balki yaxshilash kerakligi haqida oʻziga hisobot berishini ta’kidladi.
