Xiaomi kompaniyasi yangi 15S Pro smartfoni bilan birga o‘zining eng kuchli plansheti – Xiaomi Pad 7 Ultra modelini ham rasman namoyish etdi. Bu haqda ITHome xabar bermoqda.
14 dyuymli OLED ekran va yupqa korpus
Planshet 14 dyuymli OLED 3,2K ekran bilan jihozlangan. Qurilmaning qalinligi atigi 5,1 mm, og‘irligi esa 609 gramm. Ekran ramkalari esa bor-yo‘g‘i 3,95 mm kenglikda.
Xring O1 chipi
Xiaomi Pad 7 Ultra hamda 15S Pro smartfoni kompaniyaning yangi avlod protsessori – Xring O1 chipi asosida yaratilgan. Ushbu SoC AnTuTu’da 3 million ballga yaqin natija qayd etgan – bu esa planshetni bozordagi eng kuchli qurilmalardan biriga aylantiradi.
Uzun umrli batareya va 120 Vt tez zaryad
Planshet 12 000 mA/soat sig‘imli akkumulyator bilan jihozlangan. U 120 Vt quvvatda tezkor zaryadlashni qo‘llab-quvvatlaydi.
Audio va kamera imkoniyatlari
Xiaomi Pad 7 Ultra 8 ta dinamik va 4 ta kuchaytirgich bilan jihozlangan. Old kamera 32 MP bo‘lib, videoqo‘ng‘iroqlar va selfilar uchun yuqori sifatni ta’minlaydi. Orqa panelda esa ko‘p funksiyali kamera moduli joylashgan.
Narxlar
Planshet uch xil konfiguratsiyada taklif etilmoqda:
- 12 GB / 256 GB — 790 dollar
- 12 GB / 512 GB — 830 dollar
- 16 GB / 1 TB — 945 dollar
Avvalroq Kursiv Uzbekistan Xiaomi kompaniyasi yangi Xiaomi YU7 elektromobilining texnik xususiyatlarini taqdim etgani haqida yozgan edi.
