Toshkent shahri (Yakkasaroy tumani), Andijon va Xivadagi kabi zamonaviy zargarlik markazlari respublikaning boshqa hududlarida ham ochiladi. Bu haqda prezident yig‘ilishda ma’lum qildi.
Mutasaddilarga joriy yilda xomashyo, laboratoriya, o‘quv markazi, shou-rum va do‘konlarni birlashtirgan yana 6 ta markazni ishga tushirish topshirildi. Shuningdek, xorijiy dizayner va texnologlar ishtirokida zargarlarni o‘qitish rejalashtirilgan.
Bundan tashqari, birjada sotuvga chiqariladigan oltin hajmi 6 tonnadan 8 tonnagacha oshiriladi. Yangi markazlar ochilgan Toshkent, Andijon va Xorazmda, shuningdek, bu yil rejalashtirilgan Buxoro, Namangan, Samarqand, Farg‘ona va boshqa hududlarda ehtiyojdan kelib chiqib oltin zaxirasi yaratiladi.
«Tartib-intizom va shaffoflik bo‘lmagan joyda katta yutuqlarga erishib bo‘lmaydi. Soya sektorida ishlayotganlarga nisbatan qonuniy choralar ko‘riladi», — dedi Prezident.
Asillik inspeksiyasi, Soliq qo‘mitasi va Bosh prokuratura bilan hamkorlikda sohada qat’iy nazorat o‘rnatadi. Zarur hujjatlarni rasmiylashtirish uchun tadbirkorlarga bir oy muddat beriladi.
Sohani to‘liq tahlil qilgan holda «xomashyo – ishlab chiqarish – savdo» zanjiridagi barcha ishtirokchilarning ochiq faoliyatini rag‘batlantiruvchi tizim ishlab chiqish vazifasi qo‘yildi.
Avvalroq Kursiv Uzbekistan yosh tadbirkorlarga mebelsozlik sohasi uchun 5 mlrd so‘mgacha kredit berilishi haqida yozgan edi.
