Toshkentda Mudofaa texnologiyalari festivali boshlandi – foto va video

Toshkentdagi «G‘alaba bog‘i»da mudofaa sohasidagi axborot texnologiyalari festivali boshlandi. Bu haqda Mudofaa vazirligi xabar berdi.

Unda respublika Qurolli Kuchlariga mo‘ljallangan mahsulotlarni ishlab chiqaruvchi kompaniyalar ishtirok etmoqda.

Ma’lumot uchun, O‘zbekiston mudofaa sohasida 50 ta davlat va 30 ta xorijiy kompaniya bilan hamkorlik qilmoqda.

Shuningdek, 40 ta mahalliy ishlab chiqaruvchi bilan hamkorlik yo‘lga qo‘yilgan bo‘lib, natijada mudofaa sohasidagi xizmatlar hajmi 2,5 baravarga oshgan.

«Shuningdek, ko‘rgazma doirasida ishtirokchi kompaniyalarning «B2B» biznes tadbirlari, ya’ni muzokaralar o‘tkazilishi rejalashtirilgan. Undan tashqari, festival doirasida yoshlar o‘rtasida «Kiber sport», «Xakerlik ustasi», «Dasturlash», «3D modellashtirish texnologiyalari», «Robotlar jangi», Uchuvchisiz uchish apparatlarini loyihalashtirish”, «Raketamodel», «Dron-reysing» va «Kelajak transport texnologiyalari robototexnikasi» yo‘nalishlarida musobaqalar o‘tkaziladi», – deyiladi Mudofaa vazirligi xabarida.

Avvalroq «Kursiv» o‘zbekistonliklar Xotira va qadrlash kunini qanday nishonlagani haqida yozgandi.