Jahon boks prezidenti Iman Xelifdan uzr so‘radi

World Boxing xalqaro tashkiloti prezidenti Boris van der Vorst jazoirlik Olimpiada chempioni Iman Xelifdan rasman uzr so‘radi. Sababi, uning ismi sportchilarning majburiy gender tekshiruvi haqidagi bayonotida omma oldida tilga olingan, deya xabar beradi Associated Press. Bu shaxsiy hayotning buzilishi uchun tanqidlar to‘lqiniga sabab bo‘ldi.

2024-yilgi Parij Olimpiadasida oltin medalni qo‘lga kiritgan Xelif Jahon boks press-relizida to‘g‘ridan to‘g‘ri tilga olingan yagona sportchi edi.

Dushanba kuni tashkilot prezidenti Jazoir boks federatsiyasiga vaziyatdan taassuf izhor qilib xat yo‘lladi:

«Men sizga shaxsan buning uchun rasmiy va samimiy uzr so‘rash va uning shaxsiy hayoti himoyalangan bo‘lishi kerakligini tan olish uchun yozyapman», – deyiladi maktubda.

Van der Vorst bu qadam tashkilotning barcha sportchilar va federatsiyalarga bo‘lgan hurmatini ko‘rsatishi kerakligini ta’kidladi.

Avvalroq Xalqaro boks assotsiatsiyasi (XBA) tomonidan Iman Xelif va uning tayvanlik safdoshi Lin Yu-Ting 2023-yilgi jahon chempionatidan chetlashtirilgan edi. Biroq Xalqaro olimpiya qo‘mitasi (XOQ) jinsni aniqlashning avvalgi qoidalarini qo‘llagan holda, ikkala sportchiga ham musobaqalarda qatnashishiga ruxsat bergan.

World Boxing nima?

World Boxing – ilgari XOQ tomonidan tan olingan, obro‘sizlangan Xalqaro boks assotsiatsiyasiga (IBA) muqobil sifatida 2023-yilda tashkil etilgan yangi xalqaro boks federatsiyasi. Tashkilot, ayniqsa, XBA bilan bog‘liq korrupsiya va siyosiy janjallardan so‘ng Olimpiya boksiga shaffoflik, mustaqillik va ishonchni tiklashni maqsad qilgan. Tashkilotning bosh qarorgohi Shveysariyada joylashgan.

Eslatib o‘tamiz, Kursiv Uzbekistan nashri o‘zbekistonlik bokschilar Tailanddagi musobaqada birinchi o‘rinni egallagani haqida yozgan edi.