O‘zbek avtomobil sanoati haqida gap ketganda, Nexia 2 nomi albatta tilga olinadi. 2008-yildan boshlab GM Uzbekistan (sobiq UzDaewooAuto) tomonidan ishlab chiqarila boshlangan ushbu model o‘zining qulay narxi, tejamkorligi va xizmat ko‘rsatishdagi soddaligi bilan millionlab yurtdoshlarimizning e’tiborini qozongan. Ko‘plab foydalanuvchilar uchun Nexia 2 – bu nafaqat transport vositasi, balki kundalik hayotning ajralmas bir bo‘lagi hisoblanadi. Kursiv Uzbekistan ushbu mashhur model haqida ma’lumotlarni to‘pladi.
Yangilangan dizayn – sinfida nafis ko‘rinish
Nexia 2 avvalgi Daewoo Nexia modeli asosida yaratilgan bo‘lib, tashqi ko‘rinishi sezilarli darajada o‘zgartirilgan. Old va orqa faralar, bamper va radiator panjarasidagi yangiliklar avtomobilga yanada zamonaviy ko‘rinish bergan. Model klassik sedan formatida ishlab chiqarilgan bo‘lib, ayniqsa oila uchun qulay tanlov sanaladi.
Ichki makon
Avtomobilning ichki qismi oddiy, lekin funksional. Asosiy qulayliklar – elektr oynalar, konditsioner, tovush tizimi va keng yukxona bilan ta’minlangan. Haydovchi o‘rindig‘i qulay joylashgan, boshqaruv paneli esa oddiy va tushunarli. Orqa o‘rindiqlar ham yetarli darajada joyga ega bo‘lib, uzoq masofali safarlar uchun mos.
Dvigatel va texnik imkoniyatlar
Nexia 2 uch xil dvigatel varianti bilan ishlab chiqarilgan:
- 1.5 SOHC (8-klapanli, 75 ot kuchi)
- 1.5 DOHC (16-klapanli, 85 ot kuchi)
- 1.6 DOHC (109 ot kuchi, eksport versiyasi)
Barcha variantlar 5 pog‘onali mexanik transmissiya bilan jihozlangan. Mashinaning yoqilg‘i sarfi o‘rtacha 7-8 litr atrofida bo‘lib, bu uni iqtisodiy jihatdan qulay transport vositasiga aylantiradi. Ayniqsa, 1.5 SOHC modeli yoqilg‘i tejamkorligi bilan ko‘pchilik e’tiborini tortgan.
Xavfsizlik
Avtomobilning xavfsizlik darajasi o‘z sinfi uchun maqbul hisoblanadi. Ba’zi modellar haydovchi uchun havo yostiqchasi va ABS tizimi bilan jihozlangan. Kuzov mustahkam, xavfsizlik kamarlari standart talabga javob beradi.
Xizmat ko‘rsatish bo‘yicha esa Nexia 2 afzalliklarga boy: ehtiyot qismlar arzon va har doim mavjud, ta’mirlash ishlari oddiy va arzon. Shu sababli, ushbu avtomobil texnik xizmat xarajatlarini kamaytirishni istaganlar uchun ayni muddao hisoblanadi.
Bozordagi o‘rni
Nexia 2 O‘zbekiston bozorida uzoq yillar davomida eng ko‘p xarid qilingan avtomobillardan biri bo‘lib kelgan. Ayniqsa, 2008 – 2014-yillar oralig‘ida u xizmat avtomobillari, taksilar va shaxsiy foydalanish uchun eng maqbul variant sifatida qadrlangan. Hozirgi kunda ham ushbu avtomobil ikkinchi qo‘l bozorda yuqori talabga ega. Bu model budjeti cheklangan, lekin ishonchli mashina izlayotganlar uchun eng yaxshi tanlov bo‘lib qolmoqda.
Nexia 2 modelini ikkilamchi bozorda xarid qilish imkoni mavjud. Avtomobilning 2009-yili ishlab chiqarilgan varianti (217 ming km masofa yurgan) $4900 ga baholangan. Modelning narxlari holat, bosib o‘tgan masofasiga qarab belgilanadi. Masalan, 2010-yili chiqqan boshqa varianti esa $4200.
2014-yil ishlab chiqarilgan va 311 ming km masofa bosib o‘tgan variantini $1200 ga xarid qilish mumkin.
Eslatib o‘tamiz, Kursiv Uzbekistan nashri Chevrolet Damas: ilk ko‘rinishidan bugungacha bo‘lgan rivojlanish tarixi haqida maqola e’lon qilgan edi.
