Raqobat qo‘mitasi fuqarolardan kelgan 50 ga yaqin murojaatlarga asosan «Badavlat ayol» loyihasi faoliyatini o‘rgandi.
O‘rganish jarayonida loyiha ayol-qizlarga tadbirkorlik, shaxsiy rivojlanish va boshqa yo‘nalishlarda ta’lim berishga qaratilgani aniqlangan. Shuningdek, to‘lovlar «Uzum nasiya» orqali muddatli shaklda amalga oshirilishi mumkinligi qayd etilgan.
Biroq shikoyatlar asosida quyidagi muammolar aniqlangan:
- Darslar o‘z vaqtida o‘tkazilmasligi yoki malakasiz ustozlar tomonidan o‘tilishi;
- Ta’lim sifati pastligi, va’da qilingan natijalar olinmasligi;
- E’tiroz bildirgan ishtirokchilarga qo‘pol munosabat va platformadan bloklash holatlari;
- Darslar to‘xtatilgan bo‘lsa-da, avtomatik to‘lovlar davom etishi;
- Shartnomani bekor qilishdagi qiyinchiliklar, ayniqsa, chekka hududdagi fuqarolar uchun;
- A’zo bo‘lish oson bo‘lsa-da, chiqish deyarli imkonsiz ekani.
Shu munosabat bilan qo‘mita tomonidan loyiha tashkilotchilari – Helpdesk MCHJ, moliyaviy hamkori – «Shaffof moliya» va «Uzum nasiya» bilan muzokaralar olib borilmoqda.
Qo‘mita shunga o‘xshash loyihalarda qatnashishdan oldin quyidagilarga e’tibor berishga chaqirdi:
- Shartnoma shartlarini to‘liq o‘qib chiqish;
- Moddiy va vaqt imkoniyatlarni real baholash;
- Shaxsiy, ayniqsa, bank ma’lumotlarni begona shaxslarga bermaslik;
- Platformaning ishonchliligi va qonuniyligiga to‘liq ishonch hosil qilish.
Avvalroq Kursiv Uzbekistan fuqarolarning murojaatlari asosida millionlab so‘mlar qaytarilgani haqida yozgandi.
