Nega o‘zbek migrantlari Rossiyadan ketmoqda
O‘zbekistonda qurilish sohasida ish haqlarining oshgani tufayli fuqarolar Rossiyadan qaytib ketmoqda. Bu haqda O‘zbekiston Respublikasi Migratsiya agentligining sudgacha va sud tartibida nizolarni hal etish bo‘limi boshlig‘i Islomjon Hamroyev ma’lum qildi.
«Hozirda tajribali quruvchilarning daromadi O‘zbekistonda Rossiyadagi migrantlarning ish haqi darajasiga yaqinlashdi. Shu sababli, mamlakat fuqarolari tobora ko‘proq vatanida ishlashni afzal ko‘rmoqda», – dedi ekspert.
O‘zbekistonda qurilish sohasida oyiga $500 – 600 daromad topish mumkin. Biroq o‘zbekistonliklar ko‘proq $1 ming va undan yuqori ish haqi taklif qilinadigan xorijdagi bo‘sh ish o‘rinlariga qiziqmoqda, dedi Hamroyev.
Ekspertning ta’kidlashicha, O‘zbekiston va Rossiya migratsiya siyosatini rivojlantirish va mehnat migrantlari uchun ish sharoitlarini yaxshilash ustida faol ishlamoqda.
Avvalroq «Kursiv» nashri O‘zbekiston Moskvadagi yotoqxonada yuz bergan vaziyatni nazoratga olgani haqida yozgandi.
