O‘zbekiston futbol terma jamoasi futbolchisi Islom To‘xtaxo‘jayev prezident Shavkat Mirziyoyev tomonidan sovg‘a qilingan BYD avtomobilini o‘z jamoadoshi Bobur Abduxoliqovga berdi, deb yozmoqda ChampionatAsia.
Eslatib o‘tamiz, O‘zbekiston – Qatarga qarshi o‘yindan so‘ng prezident Mirziyoyev futbolchilar va murabbiylarga BYD avtomobillarini sovg‘a qilgan edi.
O‘zbekiston OAVlariga ko‘ra, Abduxoliqov mukofot olganlar ro‘yxatiga kiritilmagan. Shunga qaramay, u jahon chempionati–2026 saralashida terma jamoa safida to‘rt o‘yin o‘tkazgan va Shimoliy Koreyaga qarshi o‘yinda golli uzatma amalga oshirgan. To‘xtaxo‘jayev esa saralash bosqichida ikki o‘yinda maydonga tushgan.
2024-yilning fevralidan buyon Bobur Abduxoliqov Ozarboyjonning «Sumgait» klubida to‘p suradi. U O‘zbekiston terma jamoasi safida 18 ta o‘yin o‘tkazib, 1 ta gol urgan.
Islom To‘xtaxo‘jayev esa O‘zbekiston terma jamoasi safida 78 ta o‘yin o‘tkazgan. 2025-yil iyun holatiga ko‘ra, u AGMK klubida o‘ynaydi.
Avvalroq Kursiv Uzbekistan prezident milliy terma jamoa a’zolarini mukofotlagani haqida yozgandi.
