FIFA klublar o‘rtasidagi Jahon chempionatining ochilish o‘yini «Al-Ahli» va «Inter Mayami» jamoalari o‘rtasida bo‘lib o‘tdi. Uchrashuvda gollar qayd etilmadi va 0:0 hisobida durang bilan yakunlandi.
O‘yin Mayamidagi «Hard Rock» stadionida bo‘lib o‘tdi va 60 mingdan ortiq tomoshabin yig‘ildi.
Bellashuvning birinchi bo‘limida Misrning «Al-Ahli» klubi ustunlik qilgan bo‘lsa, ikkinchi bo‘limda «Inter Mayami» o‘yinni nazorat qilishga harakat qildi. Bahs davomida «Inter Mayami» darvozaboni Oskar Ustari muhim vaziyatlarda jamoasini qutqarib qoldi. Ayniqsa, u Trezeguet tomonidan ijro etilgan penaltini qaytarib, o‘yinning burilish nuqtasiga aylandi.
Lionel Messi bir necha bor gol urishga yaqin keldi. Uning erkin zarbasi to‘sin bilan to‘qnash keldi, yana bir vaziyatda darvozabon uni to‘xtatishga muvaffaq bo‘ldi. O‘yin oxirlarida Messi yana bir bor xavfli zarba yo‘lladi, ammo to‘p yana nishonni aniq topmadi.
Mazkur durangdan so‘ng ikki jamoa ham guruh bosqichidagi keyingi bahslarga tayyorgarlikni davom ettiradi. «Inter Mayami» navbatdagi o‘yinini 19-iyun kuni «Portu»ga qarshi, «Al-Ahli» esa «Palmeiras»ga qarshi o‘tkazadi.
Eslatib o‘tamiz, Kursiv Uzbekistan nashri 2025-yilda bir qator futbolchilarning qiymati oshgani haqida yozgan edi.
