Volvo kompaniyasi 2026-yilgi modeldagi yangilangan Volvo XC40 krossoverining savdosi boshlanganini e’lon qildi. Bu haqda ITHome nashri xabar bermoqda.
Mashina besh xil komplektatsiyada taqdim etilgan bo‘lib, ularning barchasiga 2,0 litrli turbomotor va 48 voltli «yumshoq» gibrid tizimi o‘rnatilgan. Narxlar 269 800 dan 354 800 yuangacha (taxminan $37,6 mingdan $49,5 minggacha) bo‘lgan oraliqda.
Tashqi ko‘rinishida jiddiy o‘zgarishlar bo‘lmasa-da, yangi XC40 endi 18, 19 va 20 dyuymli g‘ildirak disklari bilan taklif etiladi. Avvalgi modelda esa faqat 19 va 20 dyuymli variantlar mavjud edi. Standart komplektatsiyada panoramali tom, avtomatik yorug‘lik o‘zgarishiga ega LED faralar mavjud.
Salonda markaziy 9 dyuymli sensorli ekran va 12,3 dyuymli raqamli asboblar paneli mavjud.
Shuningdek, standart komplektatsiyada ikkinchi darajadagi haydovchiga yordam tizimlari mavjud. Yuqori toifadagi modifikatsiyalarda esa havo sifatini nazorat qilish tizimi, ikki zonali iqlim nazorati, Harman Kardon audiotizimi, smartfonlar uchun simsiz zaryadlash va avtomatik qorayuvchi tashqi oynalar mavjud.
Volvo XC40 2026 ning o‘lchamlari: uzunligi 4440 mm, kengligi 1863 mm, balandligi 1657 mm, g‘ildirak bazasi esa 2702 mm. B3 versiyasi 163 ot kuchi va 265 Nm aylanish momentiga ega. B4 versiyasining quvvati esa 197 ot kuchi, aylanish momenti – 300 Nm. Ikkala versiyada ham 7 pog‘onali, ikki muftali robotlashtirilgan uzatmalar qutisi mavjud.
Eslatib o‘tamiz, Kursiv Uzbekistan nashri Volkswagen Sagitar L sedanini namoyish qilgani haqida yozgan edi.
