Toshkent viloyati Parkent tumanining So‘qoq qishlog‘iga xos bo‘lgan So‘qoq somsasi va Andijon viloyatiga oid Andijon do‘ppisi Adliya vazirligi tomonidan geografik ko‘rsatkich sifatida davlat ro‘yxatiga olindi. Bu haqda Intellektual mulk agentligi ma’lum qildi.
So‘qoq somsasi o‘zining noyob masalliqlari — xususan, So‘qoq tog‘larida o‘sadigan «mador» o‘simligi va xamir tayyorlash usuli bilan ajralib turadi. Andijon do‘ppisi esa yuqori sifatli mato, nozik naqsh va ramziy mazmuni bilan tanilgan.
Geografik ko‘rsatkich sifatida ro‘yxatdan o‘tkazilish ushbu mahsulotlarning hududiy xosligini, tarixiy ildizlarini va madaniy qiymatini huquqiy jihatdan muhofaza qilish imkonini beradi.
Eslatib o‘tamiz, avvalroq «Tuxum barak» milliy taomi geografik ko‘rsatkich sifatida ro‘yxatdan o‘tkazilgan edi.
