Shahrisabzda qiymati $1,5 millionlik yangi kichik GES qurib bitkazildi

Shavkat Mirziyoyev Shahrisabz tumanida, Hisorak suv ombori yaqinida qurilgan Hisorak kichik gidro elektr stansiyasini ko‘zdan kechirdi. Bu haqda davlat rahbari matbuot xizmati ma’lum qildi.

Unga ko‘ra, quvvati 3,5 MVt bo‘lgan ushbu GES yiliga o‘rtacha 17,5 mln kilovatt-soat elektr ishlab chiqaradi va 7 mingdan ortiq xonadonlarni elektr bilan ta’minlaydi.

GES qurilishi to‘liq mahalliylashtirish asosida amalga oshirilgan bo‘lib, loyihaning qiymati $1,5 mlnni tashkil qiladi. Natijada yiliga 5 mln kub metr tabiiy gaz tejash imkonini beradi.

Shuningdek, kelgusi ikki yilda 12 MVt quvvatli 416 ta mikro GES qurilishi rejalashtirilgan. Bu orqali aholi elektr ta’minotini yanada yaxshilash va gidroenergetika salohiyatini oshirish ko‘zda tutilmoqda.

Eslatib o‘tamiz, avvalroq Qashqadaryoda $400 mlnlik 117 ta turizm loyihalari amalga oshirilayotgani haqida yozgan edik.