Centrum Air Samarqand – Vladivostok yo‘nalishidagi parvozlarni yo‘lga qo‘ydi

2025-yil 23-iyun kuni Centrum Air aviakompaniyasi ilk bor Samarqand – Vladivostok yo‘nalishi bo‘yicha to‘g‘ridan to‘g‘ri xalqaro aviaqatnovni amalga oshirdi. Bu haqda kompaniya Kursiv Uzbekistan’ga ma’lum qildi.

Bu tarixiy parvoz bo‘lib, avval hech bir o‘zbek aviakompaniyasi bu ikki shahar o‘rtasida to‘g‘ridan to‘g‘ri qatnovni yo‘lga qo‘ymagan edi.

Yangi yo‘nalish O‘zbekiston va Rossiyaning Primorskiy o‘lkasi o‘rtasida muhim havo koridorini ochadi. Bu ishbilarmonlik, turizm va gumanitar safarlar uchun qulay imkoniyat yaratadi.

Parvozlar zamonaviy Airbus A320 samolyotlarida haftasiga bir marta — dushanba kunlari amalga oshiriladi.

Vladivostok aeroportida ilk reys tantanali kutib olindi. Tadbirda Rossiya Turizm va Transport vazirliklari, O‘zbekiston Konsulxonasi va Primorskiy o‘lkasi gubernatori Oleg Kojemyako ishtirok etdi.

Ular ushbu aviaqatnovning mintaqaviy hamkorlikni mustahkamlashdagi ahamiyatini alohida ta’kidlashdi.

Ma’lumot uchun, 2024-yil noyabrida gubernator Kojemyako O‘zbekistonga rasmiy tashrif bilan kelgan va turizm hamda transport sohasidagi aloqalarni kengaytirish masalalarini muhokama qilgan edi.

Reys chiptalarini centrum-air.com rasmiy sayti va ruxsat etilgan agentliklardan xarid qilish mumkin.

Avvalroq Kursiv Uzbekistan Centrum Air Namangan – Moskva yo‘nalishida yangi aviaqatnovni yo‘lga qo‘yayotganligi haqida xabar bergan edi.