Chevrolet Cobalt Markaziy Osiyo mintaqasida hanuz ommabop sedanlardan biri hisoblanadi. Yil boshidan buyon 54,5 ming dona yangi Cobalt avtomobili sotilgan. Uni xaridorlar nafaqat birlamchi, balki ikkilamchi bozorda ham faol xarid qilmoqda. Kursiv Uzbekistan nashrining navbatdagi maqolasida Chevrolet Cobalt xarid qilishda e’tibor berilishi kerak bo‘lgan jihatlar yoritiladi.
Chevrolet Cobalt haqida
Chevrolet Cobalt – 1,5 litrli, 4 silindrli, 16 klapanli benzinli dvigatelga ega oila uchun qulay sedan. U 5 pog‘onali mexanik yoki 6 pog‘onali avtomatik uzatmalar qutisi bilan ta’minlangan.
Dvigatel quvvati 106 ot kuchi (79 kVt) ni tashkil etadi. Uning maksimal aylantiruvchi momenti 134 Nm (4000 ayl./min) ga teng. Yonilg‘i sarfi shaharda mexanik uzatmada 8,4 L/100 km, avtomat uzatmada esa 10 L/100 km atrofida. Shahar tashqarisida esa mos ravishda 6,2 va 6,7 L/100 kmni tashkil etadi.
Salonida konditsioner, Bluetooth va USB tizimli audio, 2 ta xavfsizlik yostiqchasi, ABS va kunduzgi chiroqlar mavjud.
Eski modellarda uchraydigan muammolar
Ba’zi eski modellarda yoqilg‘i tizimida muammo kuzatilgan. Yong‘in xavfsizligiga ta’sir qiluvchi bu nosozlik «Check Engine» chirog‘ining yoqilishiga va benzin hidining sezilishiga olib keladi.
Shuningdek, dvigatel ishga tushirilayotganda kalit tizimida nosozliklar bo‘lgan. Rul blokirovkasi yoki vaqt zanjiri tizimida uzilishlar, g‘ichirlash holatlari aniqlangan.
Ichki qismlarda ishlatilgan plastmassa qismlar tez chizilishi va sinishi sababli xaridorlar shikoyat bildirgan.
Ikkilamchi bozordagi tekshiruvlar
Avtomobil xarididan oldin uni to‘liq texnik ko‘rikdan o‘tkazish lozim. Eng avvalo, boshqaruv tizimi, dvigatel va uzatmalar qutisi to‘liq tekshirilish zarur.
Dvigatel silliq, shovqinsiz ishlashi kerak. Zanjir va volan tizimida g‘ichirlash yoki g‘alati tovushlar bo‘lsa, bu muammoga ishora qiladi.
Uzatmalar qutisida uzatishlar silliq o‘tishi, «urishish» yoki qistirish bo‘lmasligi kerak. Shuningdek, amortizator, tormoz va boshqa tizimlardagi moy yoki suyuqlik sizib chiqmayotganiga ishonch hosil qilish zarur.
Tormoz disklarini ko‘zdan kechiring. Agar qoplamada chuqurchalar, zang yoki silliqlik yo‘q bo‘lsa, bu qismlar eskirgan bo‘lishi mumkin. Tormoz yostiqlari ham korroziyaga uchramagan va yetarlicha qalin bo‘lishi kerak.
Avtomobil bo‘yoq qatlami ham muhim. Uni ultratovush o‘lchagich bilan tekshiring. Agar panel rangida yoki qalinligida farq bo‘lsa, mashina qayta bo‘yalgan bo‘lishi mumkin.
Ehtiyot qismlar va servis xizmatlari
Cobalt uchun ehtiyot qismlar O‘zbekistonda yetarli. UzAuto Motors original ehtiyot qismlarni taqdim etadi.
Ularning servis markazlari barcha viloyatlarda faoliyat yuritadi. Jumladan, Toshkent, Namangan, Samarqand, Buxoro va Qoraqalpog‘istonda rasmiy servis punktlari mavjud.
Xaridorlarga maslahatlar
Avtomobil sotib olayotganda hujjatlarni puxta tekshiring. Texnik pasportdagi ism bilan sotuvchining pasporti mos kelishi kerak.
2023-yildan boshlab avtomobillar bo‘yicha ma’lumotlar elektron shaklda berilmoqda. my.gov.uz saytiga kirib, «Avtomobil tarixi» bo‘limiga VIN-kodni kiritib, ma’lumotlarni tekshirish imkoni mavjud.
Bu orqali modelning egasi, ishlab chiqarilgan yili, rangi, yurgan masofasi, hujjatlardagi cheklovlar kabi ko‘plab tafsilotlarni bilib olish mumkin.
Agar sotuvchi avtomobil egasi bo‘lmasa, uni o‘z nomiga rasmiylashtirib olishini so‘rang.
Kursiv Uzbekistan nashri avvalroq Chevrolet Cobalt Qozog‘istonda sezilarli arzonlashgani haqida xabar bergan edi.
