Yozda biz kuchli ochlikni kamroq his qilamiz, shuning uchun yog‘li va og‘ir taomlarni kam kaloriyali alternativalar bilan almashtirish mumkin. Bundan tashqari, issiq tufayli ko‘proq terlaymiz va ko‘proq suv ichamiz, bu esa tanani shaklda ushlab turishga tabiiy ravishda yordam beradi.
Quyidagi Top – 5 ta usul bilan esa yozgi issiqni va mavsumiy mahsulotlarni o‘z foydangizga ishlatib, tez vazn tashlashingiz mumkin.
Ko‘p suv iching
Ozishni istagan har bir inson amal qilishi kerak bo‘lgan yagona qoidalardan biri — ko‘p suv ichishdir. Oddiy suv, kokos suvi, limonli suv – bularning barchasi suv balansini saqlash uchun juda yaxshi variantlar. E’tiborda tuting: ichimlikda qancha kam shakar bo‘lsa, siz uchun shuncha yaxshi. Har doim yoningizda suv olib yuring va uni kam-kamdan ho‘plab iching, shunda suyuqlik balansi tiklanadi va optimal gidratatsiya ta’minlanadi.
Mavsumiy sabzavotlarni ko‘p iste’mol qiling
Yozgi sabzavotlar kam kaloriyali bo‘ladi, ularni kundalik ratsionga ko‘proq qo‘shish vazn tashlashni tezlashtiradi. Bodring, turp, baqlajon, qovoq va boshqa foydali sabzavotlardan bemalol foydalaning – barchasi sog‘liq uchun foydali va ozishga yordam beradi.
Probiotiklarga e’tibor bering
Hindlar yozda ko‘plab nordon sut mahsulotlarini, masalan, lassi va chaas ichimliklarini iste’mol qiladi, bu esa hazmni yaxshilashga juda foydali. Yozda hazm bilan bog‘liq muammolar tez-tez uchraydi va bu ozish jarayoniga jiddiy to‘sqinlik qilishi mumkin. Shu bois, hazm tizimi salomatligini saqlash uchun yozgi ratsioningizda probiotiklar yetarli bo‘lishiga ishonch hosil qiling.
Kechki ovqatni tarvuz yoki qovun bilan almashtiring
Tarvuz va qovun – yozning asosiy ne’matlari. Bu mevalar chanqoqni yaxshi qondiradi, kaloriyasi kam va yozgi ozish rejasiga juda mos tushadi. Ammo tarvuzni uzoq muddat faqat shu tarzda iste’mol qilish xavfli. Uni kechki ovqat yoki nonushta o‘rniga vaqt-vaqti bilan iste’mol qilish mumkin, biroq doim emas.
Mashq qiling
Qishda ham, yozda ham vazn tashlashda jismoniy mashqlar muhim. Biroq issiq mavsumda jismoniy faoliyat paytida xavfsizlikka alohida e’tibor bering. Mashq paytida organizmni namlash uchun eng yaxshi ichimlik – bu oddiy suv. Unda ortiqcha shakar, konservantlar bo‘lmaydi va kofeinli energiya ichimliklaridagi kabi sun’iy energiya oshishiga sabab bo‘lmaydi. Juda issiqda yoki quyosh tepada bo‘lgan paytda tashqarida mashq qilmang.
Avvalroq O‘zbekiston va qo‘shni davlatlarda yozgi ta’tilni qayerlarda o‘tkazish mumkinligi haqida yozgandik.
