Li Auto kompaniyasi tomonidan 6 o‘rindiqli Li i8 elektromobili 29-iyul kuni Xitoy bozorida namoyish etiladi. Bu haqda CarnewsChina xabar bermoqda.
Modelning narxi $48,4 mingdan boshlanadi. Li i8 o‘rta-yirik SUV toifasiga mansub. Uning o‘lchamlari: uzunligi – 5085 mm, kengligi – 1960 mm, balandligi – 1740 mm. G‘ildirak bazasi – 3050 mmni tashkil etadi.
Tashqi ko‘rinishi Li Mega modeliga o‘xshaydi. Tanasi qora oynalar, yashirin eshik tutkichlari va 20 yoki 21 dyuymli g‘ildiraklar bilan jihozlangan.
Li i8 ikki motorli to‘liq yuruvchi tizimga ega: old motor – 150 kVt (201 ot kuchi), orqa motor – 250 kVt (335 ot kuchi). Umumiy quvvat 536 ot kuchiga teng. Maksimal tezligi 180 km/soatni tashkil etadi.
Mashina 90 yoki 97,84 kVt⋅soatli 5C ternar lityum akkumulyator bilan ta’minlanadi. CLTC standartiga ko‘ra, yurish masofasi mos ravishda 670 km va 720 km. Og‘irligi esa 2580–2610 kg.
Energiya sarfi har 100 km uchun 13,4 kVt⋅soatni tashkil etadi. 5C quvvatlantirish texnologiyasi bilan 10 daqiqada 500 km zaryad olish mumkin. Li Auto hozirda Xitoyda 2500 ta 5C superzaryad stansiyasiga ega. Bu Tesla zaryad stansiyalaridan ko‘p.
Barcha versiyalar Hesai ATL lidar bilan jihozlanadi. Bu ilg‘or haydovchi yordam tizimini bildiradi.
Ichki dizayn rasmiy taqdim etilmagan. Biroq rasmlarga ko‘ra, salon oq rangda. Markaziy va yo‘lovchi ekranlari 15,7 dyuym, 2.5K sifatda. Orqa qatordagi o‘rindiqlar 14 xil sozlanadi va massaj funksiyasiga ega. Konsolda 5°C dan 50°C gacha sovitadigan kichik muzlatgich o‘rnatilgan.
Eslatib o‘tamiz, Kursiv Uzbekistan Li Auto i6 elektromobili taqdim etilish muddatini ma’lum qilgani haqida yozgan edik.
