Isroil Damashqqa havo zarbasi berdi: Suriya armiyasi chekinmoqda

Isroil harbiy-havo kuchlari Suriyaning Damashq shahriga navbatdagi havo hujumini uyushtirdi. Bu haqda CNN axborot agentligi ma’lum qildi.

Zarba, asosan, Suriya Mudofaa vazirligi yaqinidagi binolar va harbiy infratuzilmalarga qaratilgan bo‘lib, kuchli portlashlar natijasida shahar osmoni olovga burkandi.

Rasmiy manbalarga ko‘ra, hujum oqibatida kamida 3 kishi halok bo‘lgan, 30 dan ortiq fuqaro va harbiy xizmatchilar jarohat olgan. Voqea joyida tez yordam va yong‘in o‘chirish xizmatlari ish olib bordi.

Mahalliy harbiy manbalarning bildirishicha, zarbalar Suriyaning janubiy viloyatlariga ham ta’sir ko‘rsatgan. Suveyda shahri yaqinidagi harbiy qismlar ortga chekintirildi. Bu holat mintaqadagi kuch muvozanatini o‘zgartirishi mumkin.

Xalqaro hamjamiyat, jumladan BMT, AQSh va Turkiya ushbu hujumni keskin qoraladi. Ular bu harakat mintaqada tinchlik o‘rnatishga bo‘lgan umidlarni yanada so‘ndirishini ta’kidlashmoqda.

Ayni paytda Suriyada tinch aholining xavfsizligini ta’minlash va harbiy qarama-qarshilikni bartaraf etish bo‘yicha diplomatik chora-tadbirlar muhokama qilinmoqda. Tahlilchilarga ko‘ra, bu voqea Isroil va Eron o‘rtasidagi bilvosita ziddiyatlar bilan ham bog‘liq bo‘lishi mumkin.