Chery Auto kompaniyasi 1-avgust kuni Dubayda o‘zining yangi flagman SUV modeli — iCAR V27 ni namoyish qiladi. Bu haqda CarNewsChina xabar berdi.
Dubaydagi namoyishda Chery’ning iCAR brendi ostida uchta model taqdim etiladi: yangilangan iCAR V27, ixcham iCAR V23 va iCAR 03 krossoveri. Bu uchlikning eng ilg‘ori va eng yuqori segmentga mo‘ljallangani aynan V27 bo‘ladi.
Katta SUV va uzoq yurish masofasi
Uzunligi deyarli besh metrga yetadigan iCAR V27 modeli, 1,5T turbodvigatelni elektr yuritmasi bilan birlashtirgan uzoq masofali elektr (REEV) kuch qurilmasiga ega. Model ikki xil konfiguratsiyada taklif etiladi: orqa g‘ildirakli va to‘rt g‘ildirakli. To‘rt g‘ildirakli versiyasi 335 kVt (449 ot kuchi) maksimal quvvatni berishi va CLTC standarti bo‘yicha to‘liq elektr rejimida 200 km masofani bosib o‘tishi kutilmoqda.
Xitoy ichki bozorida iCAR V27 narxi taxminan 200–250 ming yuan (taxminan $28–35 ming) atrofida bo‘lishi kutilmoqda. Bu model Xitoyda yangi energiya manbalariga asoslangan off-road SUV’lariga bo‘lgan talabni qondirishga qaratilgan va joriy yilning oxirida ichki ishlab chiqarish boshlanishi rejalashtirilgan.
Off-road uslubidagi dizayn
V27 kichikroq iCAR V23 modelining dizaynini davom ettiradi, ammo unda yanada kuchli va mustahkam elementlar qo‘llangan. Old qismi kvadrat shakldagi faralar, ularning ichida dumaloq elementlar va ko‘p panjarali radiator panjarasi bilan ajralib turadi. Yon qismi qutisimon siluetga ega, orqa qismi esa vertikal joylashgan orqa chiroqlar, tom spoyleri, yon tomonga ochiladigan orqa eshik va dekorativ orqa ryukzak elementi mavjud.
Bu dizayn elementlari avtomobilning yo‘ltanlamas xarakterini va vizual identifikatsiyasini namoyish etadi.
Bundan oldin Qozog‘istonda yig‘ilgan Chery Tiggo 9 Yevrosiyo iqtisodiy ittifoqi hududida sotuvga chiqishi haqida yozgandik.
