Infinix kompaniyasining yangi Smart 10 smartfoni Hindistonda taqdim etildi. Bu haqda GSMArena xabar bermoqda.
Qurilma faqat 4 GB operativ va 64 GB ichki xotirali variantda taklif qilinadi. Narxi 6 799 rupiy (taxminan $82). Sotuvlar 2-avgustdan Flipkart va boshqa do‘konlar orqali boshlanadi.
Smartfon Unisoc T7250 protsessori va Android 15 asosidagi XOS 15.1 operatsion tizimi bilan jihozlangan. Unda 6,67 dyuymli 120 Hz yangilanish chastotali HD+ LCD ekran bor. Akkumulyator sig‘imi 5000 mA/soat bo‘lib, 15 vattgacha USB-C orqali quvvatlanadi. Qurilma boshqa telefonlarga ham zaryad bera oladi.
Kameralarning old va orqa tomonida 8 megapiksellik linzalar joylashgan. Qurilmada yon tomonga joylashtirilgan barmoq izi skaneri mavjud. Bundan tashqari, Infinix Smart 10 chang va suvdan himoyalangan (IP64), ikki dinamik, DTS ovoz ishlov berish texnologiyasi va 2 TB gacha qo‘shimcha xotira uchun microSD kartaga ega.
Eslatib o‘tamiz, Kursiv Uzbekistan nashri 115 dollarlik Infinix Hot 60i taqdim etilgani haqida yozgan edi.
