Xitoyning robototexnika kompaniyasi Unitree o‘zining eng arzon gumanoid roboti R1’ni $5,9 ming narxda taqdim etdi.
R1 balandligi 1 210 mm (ya’ni 4 futdan biroz past), og‘irligi 25 kg va u 26 ta bo‘g‘imga ega. Uning ichki batareyasi bir marta quvvatlanganda bir soatgacha ishlaydi. U Wi-Fi va Bluetooth orqali ulanishni qo‘llab-quvvatlaydi, shuningdek, kamera, mikrofon va karnaylar orqali aloqa o‘rnata oladi.
Ko‘plab bo‘g‘imlarga va yengil vaznga ega bo‘lishi uni juda moslashuvchan qiladi. Quyida uning sportga oid harakatlarini tasvirlovchi video (yoki animatsiya) keltirilgan.
Unitree’ning ilg‘or modellari singari, R1 ushlay oladigan yoki narsalarni boshqara oladigan barmoqli qo‘llarga ega emas.
Qo‘llarining yo‘qligi, nisbatan qisqa batareya quvvati va bo‘yining pastligi sababli, R1 xarid qilingan zahoti kundalik ishlarni bajara olmaydi. U kir yuvish, idish-tovoq yuvish yoki chiqindilarni tashlab kelish kabi vazifalarni mustaqil bajara olmaydi. Ammo u hozircha ilmiy tadqiqot va ta’lim maqsadlari uchun foydali deb baholanmoqda.
Ya’ni olimlar undan algoritmlar va sun’iy intellekt modellarini sinash uchun foydalanmoqda. Shuningdek, bu robotlar sanoat sharoitida turli vazifalarni bajarishga qanchalik yaroqli va ishonchli ekanini o‘rganmoqda. Masalan, Geely avtomobil ishlab chiqaruvchi kompaniyasi Unitree robotini yig‘uv liniyasida sinovdan o‘tkazmoqda. U yerda robot avtomobil ishlab chiqarishda qanday yordam bera olishi o‘rganilmoqda.
Kompaniyaning boshqa robotlari narxi qanday
Unitree’ning H1 nomli ko‘p maqsadli roboti zinapoyaga chiqishi va orqaga salto qilish qobiliyatiga ega, ammo narxi $90 ming. Arzonroq G1 modeli esa $16 mingga tushadi. Tesla’ning Optimus roboti esa hali bozorga chiqmagan bo‘lsa-da, uning narxi $20 ming – $30 ming oralig‘ida bo‘lishi kutilmoqda. Shunday ekan, hali bu texnologiya ommaviy bozorga chiqmagan bir paytda, R1 narxining keskin tushirilgani juda katta yangilik hisoblanadi.
Shu bilan birga, R1’ning «EDU» (ta’lim) versiyasi ham mavjud. U har biri taxminan $5,2 mingga tushadigan barmoqli qo‘llar bilan jihozlangan. Bu versiyada kuchliroq kompyuter moduli ham bo‘ladi, shuning uchun narxi biroz qimmatroq.
Bundan oldin batareyalarini o‘zi almashtirgan holda 24/7 ishlaydigan gumanoid robot taqdim etilgani haqida yozgandik.
Mazkur robot UBTech Robotics kompaniyasi tomonidan ishlab chiqilgan bo‘lib, Walker S2 deb nomlanadi.
