Cobalt eng ko‘p ishlatiladigan avtomobil, 3,5 mingga yaqin ayol haydovchi — O‘zbekiston taksi bozori

2025-yilning yanvar–iyul oylarida 215 ta taksi agregatori soliq organlarining axborot tizimlariga integratsiya qilindi. 2024-yilning shu davrida bu ko‘rsatkich 155 tani tashkil etgan.

Mazkur davr mobaynida jami 262,2 million marotaba yo‘lovchi tashish xizmatlari ko‘rsatilib, umumiy aylanma besh trln so‘mdan oshdi.

Agregatorlar orqali yo‘lovchi tashish bilan 457,3 mingga yaqin o‘zini o‘zi band qilgan haydovchi shug‘ullanmoqda. Ularning yoshi quyidagicha taqsimlangan:

• 30-50 yosh oralig‘ida – 257 629 kishi (56,3%);
• 30 yoshgacha – 166 207 kishi (36,3%);
• 50 yoshdan katta – 33 477 kishi (7,3%).

Shuningdek, ushbu haydovchilar orasida 3 480 nafar ayol faoliyat yuritmoqda. Yetti oy davomida taksi xizmatlari orqali haydovchilarning daromadi quyidagicha shakllangan:

• 1 million so‘mgacha – 140,2 ming haydovchi;
• 1–5 million so‘m – 122,8 ming haydovchi;
• 5–10 million so‘m – 59,4 ming haydovchi;
• 10–50 million so‘m – 113,7 ming haydovchi;
• 50–100 million so‘m – 19,1 ming haydovchi;
• 100 million so‘mdan ortiq – 1,8 ming haydovchi.

Taksi bozorida eng ko‘p foydalanilayotgan top-3 avtomobil markasi:

• Cobalt – 23,5%;
• Nexia – 21,5%;
• Lacetti – 16,9%.

Elektromobillar ulushi esa 1,8 foizni tashkil qilmoqda. Avtomobillarning yoshi bo‘yicha eng ko‘p 3–5 yillik va `10 yildan ortiq yoshga ega avtomobillar foydalanilmoqda.

Yetti oy davomida agregatorlar tomonidan jami 98,8 mlrd so‘m soliq to‘landi. Shundan qo‘shilgan qiymat solig‘i (QQS) 55,4 mlrd so‘mni tashkil etdi.

Bundan avval 2025-yil 15-avgustdan boshlab Qozog‘istonda taksi xizmatlarining «Komfort» tarifiga yangi talablar kuchga kirishi haqida yozgandik.