Kundalik ovqatlar menyusida xilma-xillik bo‘lishini istaydiganlar uchun go‘shtli teftellar ayni muddaodir. Oson tayyorlanishi, to‘yimliligi va mazali ta’mi bilan bu taom uy bekalarining sevimli retseptlaridan biriga aylanishga ulgurgan.
Kursiv Uzbekistan uy bekalari uchun kechki ovqatga yordamga keladi. Bugungi menyuda mazasi, ko‘rinishi va foydasi bilan ajralib turadigan go‘shtli teftellarni tayyorlaymiz.
Kerakli masalliqlar: teftel uchun
| Mahsulot nomi | Miqdori |
|---|---|
| Mol go‘shtidan qiyma | 500 gramm |
| Piyoz | 150 gramm |
| Tost non (oq non) | 50 gramm |
| Sut | 100 ml |
| Tuxum | 1 dona |
| Guruch | 120 gramm |
| Sarimsoq piyoz | 2 tishcha |
| Quritilgan paprika | 1 choy qoshiq |
| Tuz, qora murch | Ta’bga ko‘ra |
Qaylasi uchun
| Mahsulot nomi | Miqdori |
|---|---|
| Piyoz | 200 gramm |
| Qizil sabzi | 200 gramm |
| Pomidor | 300 gramm |
| Pomidor pastasi | 1 osh qoshiq |
| O‘simlik yog‘i | Qovurish uchun |
| Tuz, murch | Ta’bga ko‘ra |
Tayyorlash bosqichlari: qiyma uchun harakat
Dastlab tog‘orachaga qiymani soling. Ustidan tuxum, tuz, murch va paprika qo‘shing. Sutga ivitilgan non va maydalangan piyozni go‘sht qiymalagichdan o‘tkazib, qiymaga solib, yaxshilab aralashtiring.
Guruch qo‘shish
Guruchni sovuq suvda yuvib yoki biroz pishirib olib qiymaga aralashtiring. Uzunchoq shakldagi guruch ishlatilsa, pishgach teftellarga tipratikon shaklini beradi.
Teftellar yasash
Qiymadan bir xil kattalikdagi dumaloq teftellar yasang.
Qaylasini tayyorlang
Tovaga yoki qozonga yog‘ solib qizdiring. Yirik to‘g‘ralgan piyoz va sabzini solib, tillarangga kirguncha qovuring. Qirg‘ichdan o‘tkazilgan pomidor va 1 osh qoshiq pomidor pastasini soling. Bir necha daqiqa qaynating.
Teftellarga dam bering
Qayla ustidan teftellarni terib chiqing. Kerak bo‘lsa, ozroq suv qo‘shing. So‘ng, qopqog‘ini yopib, 30 daqiqa davomida dimlab pishiring.
Tayyor bo‘lgan teftellarni issiqligida, qaylasi bilan birga dasturxonga torting. Yangi pishgan non va yaqinlar davrasida taom yanada to‘liqroq bo‘ladi. Yoqimli ishtaha!
Avvalroq Kursiv Uzbekistan Maqluba va Go‘sht Say qanday tayyorlanishi haqida yozgandi.
