Yapon oshxonasining eng mashhur taomlaridan biri bo‘lgan Teriyaki tovuqli taomi iste’mol uchun qulay hisoblanadi. Uning asosiy jozibasi – o‘ziga xos shirin va sho‘r lazzat uyg‘unligida, ishtahani ochuvchi ko‘rinishida va albatta to‘yimli tarkibida. Taom bayram dasturxonlari uchun ham, kundalik ovqat uchun ham ideal tanlov bo‘la oladi.
Kursiv Uzbekistan kechki ovqatga 4 kishilik mazali Teriyaki tovuqli taomining retsepti bilan tanishtiradi.
Kerakli masalliqlar
| Mahsulot nomi | Miqdori |
|---|---|
| Tovuq go‘shti (lahm) | 400 gramm |
| Zaytun yog‘i | 1 osh qoshiq |
| Sarimsoq piyoz | 2 tish |
| Zanjabil (maydalangan) | 1 osh qoshiq |
| Guruch | 150 gramm |
| Iliq suv | 560 millilitr |
| Soya qaylasi | 125 millilitr |
| Guruch sirkasi | 1 osh qoshiq |
| Asal | 60 millilitr |
| Makkajo‘xori kraxmali | 1 osh qoshiq |
| Brokkoli karami | 70 gramm |
| Qizil sabzi | 70 gramm |
| Qizil bulg‘or qalampiri | 0,5 dona |
| Tuz va qora murch | Ta’bga qarab |
| Ko‘k piyoz | Yarim bog‘ |
Pishirish jarayoni
Masalliqlarni tayyorlab oling
Tovuq go‘shtini uzunchoq, sabzavotlarni esa o‘rtacha kattalikda to‘g‘rab chiqing. Brokkoli ham yirikroq bo‘laklarga ajratiladi.
Qovurish bosqichi
Zaytun yog‘ini tovaga solib qizdiring va tovuq go‘shtini soling. 8 daqiqa davomida doimiy aralashtirib qovuring. Tuz va qora murch seping.
Sarimsoq va zanjabil qo‘shiladi
Maydalangan sarimsoq va zanjabilni tovuq ustiga soling, biroz aralashtirib yana qovuring. Bu taomga o‘tkir, ammo yoqimli hid va ta’m bag‘ishlaydi.
Guruchni pishirish
Idishga suv quyib, yuvilgan guruchni soling va qaynash darajasiga yetkazing. Qopqog‘ini yopib, o‘rtacha olovda 15–20 daqiqa davomida pishiring.
Teriyaki sousini tayyorlash
Tovuqqa soya qaylasi, guruch sirkasi va asal soling. Yaxshilab aralashtiring. Kraxmalni 60 ml suvga aralashtirib, taomga qo‘shing. Sous quyuqlashguncha, 3–4 daqiqa davomida pishiring.
Sabzavotlarni qo‘shish va yakuniy dimlash
Brokkoli, sabzi va bulg‘or qalampirini qo‘shing. 5 – 7 daqiqa davomida dimlab pishiring – sabzavotlar o‘z shakli va qarsildoq tuzilishini yo‘qotmasligi kerak.
Dasturxonga tortish
Tayyor Teriyaki tovuqli taom ustiga maydalangan ko‘k piyoz va xohlasangiz, kunjut seping. Issiq holatda guruch bilan birga tortiladi.
Yapon ta’mini his eting va oila davrasida baham ko‘ring. Yoqimli ishtaha!
Avvalroq Kursiv Uzbekistan kechki ovqat uchun go‘shtli teftel, Maqluba va Go‘sht Say’ning qanday tayyorlanishini keltirib o‘tgandi.
