Turkiyaning «Istanbul Bashakshehir» klubi hali ham Moskva SSKA jamoasiga yarim himoyachi Abbosbek Fayzullayev transferi uchun to‘lovni amalga oshirmagan.
Bu haqda «armiyachilar» vakili Kirill Breydo Sport-Ekspress’ga ma’lum qildi.
«Hozircha «SSKA» Abbos transferi uchun pul olgani yo‘q. Biz turk klubi bilan aloqadamiz. Mablag‘ni shu hafta kutyapmiz», — dedi u.
21 yoshli futbolchi iyul oxirida Moskva klubini tark etib, «Istanbul Bashakshehir» bilan besh yillik shartnoma imzolagan edi. Transfermarkt ma’lumotiga ko‘ra, uning transfer narxi 8 mln yevroni tashkil qiladi.
Avvalroq Kursiv Uzbekistan Abbosbek Fayzullayev rasman «Istanbul Bashakshehir» klubiga o‘tgani haqida xabar bergan edi.
