Isroil falastinliklarni G‘azodan ko‘chirishni rejalashtirmoqda
Isroil Janubiy Sudan hukumati bilan G‘azo sektoridagi falastinliklarni bu mamlakatga ko‘chirish bo‘yicha muzokara qilmoqda. Bu haqda Associated Press xabar berdi.
Bu reja Isroilning G‘azodan ommaviy migratsiyani rag‘batlantirish tashabbusining bir qismi bo‘lib, hudud 22 oylik Hamasga qarshi harbiy amaliyotdan keyin vayronaga aylangan.
Nashr xabariga ko‘ra, muzokaralar tafsilotlari noma’lum. Ammo u amalga oshirilsa, bu odamlarni urush va ochlik xavfi bo‘lgan bir hududdan yana boshqa xavfli hududga ko‘chirish bo‘ladi. Bu esa inson huquqlari bo‘yicha xavotir uyg‘otadi.
Isroil Bosh vaziri Benyamin Netanyaxu bu jarayonni «ixtiyoriy migratsiya» deb atamoqda. U ilgari boshqa Afrika davlatlariga ham shunday takliflar bergan. Falastinliklar, inson huquqlari tashkilotlari va ko‘plab davlatlar bu rejalarga qarshi chiqib, buni xalqaro huquqni buzuvchi majburiy ko‘chirish deb baholashmoqda.
Janubiy Sudan uchun bunday kelishuv Isroil bilan yaqinlashish va AQSh bilan aloqalarni kuchaytirish imkonini berishi mumkin. Shu bilan birga, Isroil Janubiy Sudanda falastinliklar uchun vaqtinchalik lagerlar tashkil etish variantini ham ko‘rib chiqmoqda.
Misr bu rejalarga qat’iy qarshi bo‘lib, G‘azodan falastinliklarni chiqarish ularning o‘z hududiga ham qochqinlar oqimiga olib kelishidan xavotirda.
Bundan oldin Isroil va AQSh Somali bilan ham shunday muzokaralar olib borgan, biroq ularning natijasi noma’lum qolgan.
Janubiy Sudan ichki urushdan keyin iqtisodiy qiyinchiliklar va korrupsiya bilan kurashmoqda, aholining katta qismi esa xalqaro yordamga muhtoj. Mutaxassislar falastinliklar bu yerda ham xavfsiz bo‘la olmasligini, tarixiy-diniy ziddiyatlar sabab kelishmovchiliklar yuzaga kelishi mumkinligini ta’kidlashmoqda.
Avvalroq Avstraliya sentabr oyida Falastin davlatini tan olishi, shuningdek, gʻarbning 15 davlati Falastinni davlat sifatida tan olish bo‘yicha qo‘shma bayonot bergandi.
