Samsung Galaxy S26 Ultra unumdorlik bo‘yicha sezilarli yangilanishlarga ega bo‘ladi. Oldingi modellarda asosan protsessor yaxshilangan bo‘lsa, bu safar kompaniya tezkor xotirani ham kuchaytirishga qaror qilgan. Ushbu qaror qurilmaning ishlash tezligi va energiya tejamkorligiga bevosita ta’sir qiladi.
Tarqalgan ma’lumotlarga ko‘ra, yangi flagman Micron ishlab chiqqan, so‘nggi avlod LPDDR5X operativ xotirasi bilan jihozlanadi. Uning tezligi 10,7 Gbit/s bo‘lib, Galaxy S25 Ultra’dagi 9,6 Gbit/s tezlikka ega 1-beta texnologiyasidan ancha yuqori. Galaxy S26 Ultra’da 1-gamma texnologiyasi qo‘llanadi. Bu texnologiya nafaqat rekord tezlik, balki yaxshilangan energiya samaradorligini ham ta’minlaydi.
Micron’ning ta’kidlashicha, 1-gamma LPDDR5X – bozordagi eng tezkor mobil operativ xotira. U sun’iy intellekt va yuqori o‘tkazuvchanlik talab qiladigan og‘ir ilovalar uchun juda mos. Bu katta hajmdagi ma’lumotlarni tezroq qayta ishlash, javob berish vaqtini qisqartirish va interfeys ishini yanada silliq qilish imkonini beradi.
Muhim afzalliklardan yana biri energiya sarfini avvalgi avlod xotirasiga qaraganda 20 foizgacha kamaytirishdir. Bu yuqori unumdorlik tezroq quvvat sarfiga olib keladigan zamonaviy flagmanlar uchun muhim.
Amaliyotda bu Galaxy S26 Ultra’ning foto-video ishlov berish yoki og‘ir o‘yinlarni ishga tushirishda ham zaryadsiz uzoqroq ishlashini anglatadi.
Yangi avlod flagman protsessori bilan birgalikda Galaxy S26 Ultra 2025-yilning eng tez va energiya samarador smartfonlaridan biri bo‘lishi kutilmoqda. Samsung bu safar oddiy evolyutsion yangilanish emas, balki foydalanuvchilar kundalik foydalanishda sezadigan sifatli sakrashga intilmoqda.
Eslatib o‘tamiz, Kursiv Uzbekistan Samsung Galaxy S26 Ultra eng tezkor xotiraga ega bo‘lishi haqida yozgan edi.
