«Maxsustrans»ning moliyaviy ahvoli judayam yomon — Shavkat Umurzoqov

Toshkent shahri hokimi Shavkat Umurzoqov «O‘zbekiston 24» telekanaliga bergan intervyusida «Maxsustrans»ning moliyaviy ahvoli yomonligini aytdi.

Uning so‘zlariga ko‘ra, 2022–2023-yillarda korxonaning zarari 45 milliard so‘mni tashkil qilgan. Shuningdek, shaharda chiqindi uchun konteynerlar yetishmaydi va moliyaviy muammolar tufayli chiqindi olib chiqish grafigi ham buzilgan.

Hokim muammoni hal qilish uchun raqamlashtirish zarurligini ta’kidladi. Misol sifatida u «Toza Poytaxt» platformasini keltirdi. Bu tizim chiqindi olib chiqish jadvalini nazorat qilish imkonini beradi va sentabr boshidan boshlab poytaxtning barcha tumanlarida ishga tushiriladi.

Uning yordamida 34 turdagi maxsus texnika xarid qilingan, yonilg‘iga uch milliard so‘m tejalgan va chiqindi mashinalari haydovchilarining ish haqi to‘rt milliard so‘mdan sakkiz milliard so‘mgacha oshirilgan.

Hokim aytishicha, texnika boshqaruv tizimi tufayli kechasi ham ishlaydigan smenalar yo‘lga qo‘yilgan. Bundan tashqari, yana 480 ta chiqindi qabul qilish stansiyasini qurish ishlari olib borilmoqda.

Bundan avval O‘zbekistonda shina va batareyalarga ekosbor joriy etilishi mumkinligi haqida yozgandik.