Mubashshir Ahmadga oid jinoyat ishi ko‘rib chiqilmoqda

19-avgust kuni jinoyat ishlari bo‘yicha Toshkent shahar Uchtepa tumani sudi ochiq sud majlisida Alisher Tursunov, muxlislar orasida Mubashshir Ahmad nomi bilan tanilgan shaxsga oid jinoyat ishini ko‘rib chiqishni boshladi. Ish jinoyat ishlari bo‘yicha sudya Bobir Rahimov raisligida amalga oshirilmoqda.

Tergov organlari xulosasiga ko‘ra, Mubashshir Ahmad milliy, irqiy, etnik yoki diniy adovat qo‘zg‘atish, jamoat xavfsizligiga tahdid soluvchi materiallarni ommaviy axborot vositalarida tayyorlash va tarqatish, shuningdek, diniy mazmundagi materiallarni noqonuniy muomalaga kiritish bilan ayblanmoqda. Ushbu moddalarga ko‘ra, jazolar jarima va majburiy jamoat ishlaridan tortib, 3 yildan 8 yilgacha ozodlikdan mahrum etishgacha bo‘lgan sanksiyalarni nazarda tutadi. Hozirda unga nisbatan ehtiyot chorasi sifatida qamoqqa olish qo‘llanilgan.

Ma’lumot uchun, Mubashshir Ahmad 1974-yilda Namanganda tug‘ilgan. U Toshkent Islom instituti va Qohiradagi Al-Azhar universitetini tamomlagan, shayx Muhammad Sodiq Muhammad Yusufda ta’lim olgan. 2017-yilda u Azon New Media media guruhini tashkil etgan bo‘lib, unga sayt, radio va onlayn televideniye kirgan. 2023-yil avgust oyida faoliyat to‘xtatilgan, keyinchalik to‘rt tilda ishlovchi Azon Global portali tashkil etilgan.

2023-yil oxirida Tursunov Turkiyada qo‘lga olinib, deportatsiya markaziga joylashtirilgan va 2024-yil fevralida ozod qilingan. May oyida u qayta hibsga olinib, O‘zbekistonga deportatsiya qilingan. Dastlab unga Jinoyat kodeksining 244-2-moddasi (ekstremistik tashkilotlarda ishtirok etish) qo‘yilgandi.

Sud jarayonining keyingi tafsilotlari ish yakuni bo‘yicha e’lon qilinadi. Shu bilan birga, ta’kidlanadiki, aybsizlik prezumpsiyasiga muvofiq, sudlanuvchi sud hukmi bilan ayblari isbotlanmaguncha aybsiz hisoblanadi.

Eslatib o‘tamiz, avvalroq qamoqqa olinganlarning hibsxonaga joylashtirilishidan oldin majburiy tibbiy ko‘rikdan o‘tishi haqida yozgan edik.