Mehnat xavfsizligi va sanitariya talablari bo‘yicha yangi tartiblar joriy etildi
Kambag‘allikni qisqartirish va bandlik vazirligi mehnatni muhofaza qilish va xavfsizlik qoidalariga oid yangi tartiblarni tasdiqladi. Bu haqda vazirlik matbuot xizmati ma’lum qildi.
2025-yil 4-avgustda qabul qilingan mazkur buyruq asosida bir qator idoraviy normativ-huquqiy hujjatlarga muhim o‘zgartirishlar kiritildi. Ular mehnatni muhofaza qilish, ishlab chiqarish xavfsizligi, tibbiy ko‘riklar, texnik reglamentlar va sanitariya-gigiyena normalarini yanada takomillashtirishga qaratilgan.
Jumladan, issiqlik izolyatsiya materiallari ishlab chiqarish, matbaachilik va klinik laboratoriyalar sohasida xodimlar mehnatini muhofaza qilish tartiblari yangilandi.
Yangi talablarga ko‘ra:
- 50 va undan ortiq xodim ishlaydigan tashkilotlarda albatta mehnatni muhofaza qilish xizmati yoki mutaxassis lavozimi joriy etiladi;
- baxtsiz hodisalarni tekshirish, majburiy tibbiy ko‘riklarni tashkil etish tartiblari kuchaytiriladi;
- ishlab chiqarish binolarida xavfsizlik va sanitariya qoidalariga qat’iy rioya etilishi shart bo‘ladi.
Buyruq Qurilish va uy-joy kommunal xo‘jaligi vazirligi bilan kelishilgan bo‘lib, 2025-yil 18-avgustda Adliya vazirligida davlat ro‘yxatidan o‘tkazildi va rasmiy e’lon qilingan kundan kuchga kirdi.
Eslatib o‘tamiz, avvalroq QQSga o‘tgan korxonalar bir yil davomida foyda solig‘idan ozod qilinishi haqida yozgan edik.
