Tom’s Guide nashri 2025-yil uchun eng yaxshi smartfonlar haqida maqola e’lon qildi. Unda narx, texnik imkoniyatlar va kamera qulayligiga urg‘u qaratilgan.
Samsung Galaxy S25 Ultra
Samsung Galaxy S25 Ultra 200 MP kamera, AI ProVisual tizimi va uzoq quvvatli batareyasi bilan flagman smartfon. Qurilma 6,9 dyuymli AMOLED ekranga ega, 144 Hz yangilanish tezligi va HDR10+ qo‘llab-quvvatlaydi.
Snapdragon 8 Gen 4 protsessorida ishlaydi, 12/16 GB tezkor xotira va 256 GB dan 1 TB gacha saqlash imkoniyati mavjud. Batareyasi 5500 mA·soat, 65 Vt tezkor quvvatlash va simsiz zaryadlashni qo‘llab-quvvatlaydi.
Old kamera 50 MP, asosiy modul esa 200 MP bo‘lib, 10x optik zum va tungi suratga olish imkoniyati mavjud. Samsung Galaxy SI yordamida surat tahriri, ovoz tarjimasi va matn generatsiyasi kabi aqlli funksiyalarni taqdim etadi. S25 Ultra IP68 himoyaga ega, korpusi mustahkam materialdan tayyorlangan, yangi S Pen qo‘shimcha imkoniyatlar bilan ishlaydi.
iPhone 16 Pro Max
iPhone 16 Pro Max – Apple’ning eng kuchli va uzoq ishlaydigan flagman smartfoni. 6.9‑dyuymli Super Retina XDR OLED ekran (120 Hz, HDR, 2000 nits) va A18 Pro chip (6‑yadroli CPU, 6‑yadroli GPU, 16‑yadroli NPU) asosida ishlab chiqilgan. Kamera tizimi uch modulli: 48 MP keng, 48 MP ultrakeng (makro), 12 MP telefoto (5× optik zum) va LiDAR sensor.
Yordamchi Camera Control tugmachasi foto‑video boshqaruvini soddalashtiradi. Batareya 33 soat video ko‘rsatuv imkonini beradi. Bu iPhone tarixidagi eng uzoq batareya. Qurilma IP68 himoya, Wi‑Fi 7, USB‑C port va Apple Intelligence funksiyalari bilan jihozlangan. iPhone’lar odatda 6 yil yangilanish oladi.
Google Pixel 9a
2025-yilda taqdim etilgan va o‘rta sinf segmentida eng yaxshi variantlardan biri sifatida tanilmoqda. Smartfon 6,3 dyuymli OLED displeyga ega bo‘lib, 120 Hz yangilanish tezligi va yorqin tasvir sifati bilan ajralib turadi. Qurilma Tensor G4 chipida ishlaydi, bu esa unga flagmanlarga yaqin quvvat beradi.
Pixel 9a’ning eng katta afzalliklaridan biri 5100 mA·soatli batareyasi bo‘lib, bu telefonni uzoq vaqt ishlatish imkonini beradi.
Kamera tizimi ham kuchli – 48 MP asosiy sensor va sun’iy intellekt yordamida qayta ishlangan suratlar deyarli raqobatchilardan ustun turadi. Telefon suv va changdan himoyalangan, Android 15 bilan chiqdi va Google uni 7 yil davomida yangilanishlar bilan qo‘llab-quvvatlashini va’da qilgan. Pixel 9a o‘z segmentida yuqori sifat va uzoq muddatli qo‘llab-quvvatlashni taqdim etuvchi eng maqbul tanlov sifatida baholanmoqda.
Google Pixel 9 Pro
Google’ning premium segmentdagi flagman smartfoni bo‘lib, u ilg‘or sun’iy intellekt funksiyalari va kuchli kamera imkoniyatlari bilan ajralib turadi. Qurilma yangi Tensor G4 chipi va Titan M2 xavfsizlik protsessori bilan ta’minlangan, 16 GB tezkor xotira esa yuqori unumdorlikni kafolatlaydi.
Telefonning 6,3 dyuymli LTPO OLED ekrani Full HD+ aniqlikda bo‘lib, 1 dan 120 Hzgacha adaptiv chastota va 3000 nitgacha yorqinlikni qo‘llab-quvvatlaydi. Asosiy kamera tizimida 50 megapikselli keng modul, 48 megapikselli ultrakeng obyektiv va 48 megapikselli telefoto obyektiv joylashgan. Telefoto obyektiv 5 baravargacha optik zumni taqdim etadi, old kamera esa 42 megapikselli ultrakeng sensorga ega.
Pixel 9 Pro 5050 mA·soat sig‘imli akkumulyator bilan jihozlangan bo‘lib, 30 Vt tezkor quvvatlash va 23 Vt simsiz quvvatlashni qo‘llab-quvvatlaydi. Energiya tejash rejimida qurilma 72 soatgacha ishlashi mumkin. Telefon IP68 darajasida suv va changdan himoyalangan, shuningdek Gorilla Glass Victus 2 bilan mustahkamlangan.
OnePlus 13
OnePlus 13 kompaniyaning yangi flagman smartfoni sifatida e’lon qilingan. U kuchli texnik xususiyatlari va zamonaviy dizayni bilan ajralib turadi. Qurilma Snapdragon 8 Gen 4 protsessori asosida ishlaydi va yuqori unumdorlikni ta’minlaydi. Tezkor xotira 16 GB gacha, doimiy xotira esa 1 TB gacha bo‘lishi mumkin.
Smartfon 6,8 dyuymli OLED ekranga ega, u LTPO texnologiyasi yordamida 1 dan 120 Hzgacha adaptiv yangilanish chastotasini qo‘llab-quvvatlaydi. Ekranning maksimal yorqinligi 3000 nitga yetadi va Gorilla Glass Victus 2 bilan himoyalangan.
Asosiy kamera tizimida 50 megapikselli Sony LYT-808 sensori asosiy modul sifatida ishlatilgan. Shuningdek, 48 megapikselli ultra keng obyektiv va 64 megapikselli periskop telefoto obyektiv mavjud. Old kamera esa 32 megapikselli bo‘lib, yuqori sifatli selfi va videoqo‘ng‘iroqlarni ta’minlaydi.
Eslatib o‘tamiz. Kursiv Uzbekistan eng yaxshi kameraga ega hamyonbop Samsung smartfonlari haqida yozgan edi.
