Isroil armiyasi 20-avgust kuni G‘azo shahrini egallash bo‘yicha operatsiyaning dastlabki bosqichlari boshlanganini bildirdi. Bu haqda Reuters agentligi ma’lum qildi.
Brigada generali Effi Defringa ko‘ra, Isroil kuchlari allaqachon shahar chekkalarini nazorat qilmoqda va hujum bosqichma-bosqich davom ettiriladi.
Hamas esa Netanyahuni sulhga to‘sqinlik qilib, «aybsiz aholiga qarshi shafqatsiz urushni davom ettiryapti» deya aybladi. Shu bilan birga, Isroil o‘n minglab zaxira askarlarni safarbar etmoqda.
Ma’lumot uchun, urush 2023-yil oktabrida Hamasning Isroilga hujumi ortidan boshlangan edi. Shundan buyon G‘azo sektorida 62 mingdan ortiq falastinlik halok bo‘lgan, ularning ko‘pchiligi ayollar va bolalar.
Xalqaro hamjamiyat Isroilni ehtiyotkorlikka chaqirmoqda, ammo hukumat Hamas qurolsizlantirilmaguncha janglarni to‘xtatmasligini bildirmoqda. Shu bilan birga, vositachilar yangi 60 kunlik sulh rejasi ustida muzokaralar olib bormoqda.
Ayni paytda G‘azoda ko‘plab uylar, maktablar va masjidlar vayron bo‘lgan, yuz minglab odamlar esa boshpanasiz qolmoqda. Ko‘plab davlatlar Isroilni hujumlarni to‘xtatishga chaqirsa-da, hukumat o‘z rejalaridan qaytmagan.
Mutaxassislarning fikricha, G‘azo shahrini to‘liq egallash katta talafotlarga olib kelishi mumkin, shuning uchun xalqaro bosim yanada kuchayishi kutilmoqda.
Eslatib o‘tamiz, avvalroq Hamas Isroil bilan 60 kunlik sulhga rozi bo‘lgan edi.
