Realme kompaniyasi ijtimoiy tarmoqlarda e’lon qilgan rasmiy tizerga ko‘ra, kompaniya 15 000 mA/soat akkumulyator bilan jihozlangan smartfonini taqdim etadi. Bu ko‘rsatkich hozirgacha bozorda mavjud bo‘lgan deyarli barcha modellardan ikki baravar yuqori.
Uzoq muddatli ishlash
Realme reklama shiori sifatida «Dramatizm ekranda saqlansin, batareyada emas» jumlasini tanladi. Kompaniya ma’lumotiga ko‘ra, yangi smartfon 50 soat uzluksiz video translatsiyani ta’minlay oladi.
Dizayn va texnik xususiyatlar
Tizerda smartfonning orqa paneli ko‘rsatilgan, unda akkumulyator hajmi yozuvi aniq ko‘rinadi. Qurilma katta hajmli bo‘lgani uchun uning korpusi odatiy smartfonlarga nisbatan ancha qalin bo‘lishi kutilmoqda. Realme bu modelda eng kuchli flagman protsessorni ishlatmasligi ham ehtimol, chunki asosiy urg‘u uzoq muddatli ishlashga qaratilgan.
Oldingi tajriba
Eslatib o‘tamiz, Realme 2025-yil may oyida 10 000 mA/soat batareyaga ega prototip smartfon namoyishini o‘tkazgan edi. Endi esa kompaniya bu ko‘rsatkichni yanada oshirib, bozor uchun rekord darajadagi 15 000 mA/soatga chiqdi.
Taqdimot sanasi
Rasmiy taqdimot 27-avgust kuni bo‘lib o‘tadi. Narx va boshqa texnik tafsilotlar esa shu tadbirda oshkor qilinadi.
Avvalroq Kursiv Uzbekistan Realme yangi smartfoni rekord darajadagi batareya bilan chiqishi haqida ma’lumot bergan edi.
