Xiaomi o‘zining yangi Redmi Note 15 R smartfonini taqdim etdi. Bu haqda ITHome texnologiya nashri xabar bermoqda.
Qurilma katta 7000 mA·soat batareya, 144 Hz ekran va Snapdragon 6s Gen 3 protsessori bilan ajralib turadi. Redmi Note 15 R modeli 6,9 dyuymli IPS displeyga ega bo‘lib, Full HD+ aniqlik va 144 Hz yangilanish tezligini taqdim etadi. Smartfon Snapdragon 6s Gen 3 protsessori asosida ishlaydi. Xotira hajmi 8 dan 12 GB gacha RAM va 256 dan 512 GB gacha doimiy xotirani o‘z ichiga oladi.
Asosiy kamerasi ikkita datchikdan tashkil topgan bo‘lib, ular 50 megapikselli va 8 megapikselli. Old kamera haqida ma’lumot keltirilmagan. Qurilma 7000 mA·soat sig‘imli akkumulyator bilan jihozlangan bo‘lib, 33 vattli tezkor zaryadlashni va 18 vattli qayta zaryadlashni qo‘llab-quvvatlaydi.
Smartfon IP64 sertifikatiga ega, ya’ni suv sachrashidan va changdan himoyalangan. Qo‘shimcha imkoniyatlar qatorida NFC, infraqizil port va kuchli stereo dinamiklar mavjud. Operatsion tizim sifatida Android 15 ishlaydi va u HyperOS 2.0 interfeysi bilan birga taqdim etiladi.
Narxlar
| Xotira konfiguratsiyasi | Narx (USD) |
|---|---|
| 8 GB RAM / 256 GB ROM | $210 |
| 12 GB RAM / 256 GB ROM | $265 |
| 12 GB RAM / 512 GB ROM | $305 |
Eslatib o‘tamiz, Kursiv Uzbekistan Redmi Note 15 Pro+ qattiq sinovlardan omon chiqqani haqida yozgan edi. Xiaomi prezidenti Lu Veybing yangi Redmi Note 15 Pro+ smartfonining mustahkamligini namoyish etgan.
U telefonni turli hajmdagi bolg‘alar bilan urib ko‘rdi va 1,8 metr balandlikdan tushirishni sinovdan o‘tkazdi. Natijada ekranda, hatto, tirnalish ham kuzatilmadi.
