Dori vositalari va tibbiy jihozlarni ro‘yxatdan o‘tkazish tartibi yangilanadi

2026-yil 1-yanvardan dori vositalari va tibbiy jihozlar muomalasi xalqaro talablarga moslashtiriladi. Bu haqda Adliya vazirligi ma’lum qildi.

Unga ko‘ra, endilikda tibbiy jihozlar xavf darajasiga qarab 4 toifaga bo‘linadi va faqat klinik tadqiqotlarning ijobiy natijasi asosida ro‘yxatdan o‘tkaziladi.

2027-yildan boshlab dori vositalari uchun ishlab chiqaruvchining GMP milliy sertifikati, tibbiy jihozlar uchun esa ISO:13485 standartiga muvofiqlik sertifikati majburiy bo‘ladi.

Shuningdek, ro‘yxatdan o‘tkazilganlik guvohnomasi 5 yil muddatga beriladi. Mahalliy ishlab chiqaruvchilarning avval muddat cheklanmagan guvohnomalari ham yangi tartib asosida 5 yil bilan chegaralanadi.

Bundan tashqari, dori vositalari va tibbiy jihozlarni ishlab chiqarish huquq egasining buyurtmasi asosida, tegishli litsenziyaga ega ishlab chiqaruvchilar orqali shartnoma asosida amalga oshirilishi mumkin.

Tibbiy jihozlarni chakana sotish faoliyati uchun litsenziya talabi bekor qilinadi. Endilikda ushbu faoliyatni faqat vakolatli organni xabardor qilish orqali yuritish mumkin bo‘ladi.

Eslatib o‘tamiz, avvalroq O‘zbekistonda ilk bor unikal yurak jarrohligi amalga oshirilgani haqida xabar bergan edik.