Xitoyda Geely Galaxy M9 gibrid avtomobili oldindan savdoni boshladi. Bu haqda CarNewsChina xabar bermoqda.
Ma’lum qilinishicha, boshlang‘ich narx 193,800 yuan ($27 ming) etib belgilandi. Model oilaviy 6 o‘rinli variant bo‘lib, ikki kamerali havo suspenziyasi, 870 ot kuchigacha quvvat va 210 km elektr yurish masofasini taklif etadi. Kelgusida model xorijiy bozorga ham chiqarilishi rejalashtirilgan.
Geely Galaxy M9 o‘lchamlari 5205×1999×1800 millimetrni tashkil etadi, g‘ildirak bazasi esa 3030 millimetr. Ichki makoni 2+2+2 tarzida joylashtirilgan bo‘lib, barcha o‘rindiqlar elektr sozlamaga ega. Ular isitish, ventilyatsiya va massaj funksiyalari bilan jihozlangan.
Multimedia tizimida 12,66 dyuymli panel, 30 dyuymli umumiy ekran va orqa yo‘lovchilar uchun 17,3 dyuymli 3K monitor mavjud. Qo‘shimcha qulayliklar qatorida 9,1 litrli sovitkich va 27 karnaydan iborat Flyme Sound audio tizimi bor.
Quvvat tizimi 1,5 litrli turbomotor hamda uchta elektromotordan iborat bo‘lib, jami 870 ot kuchini ta’minlaydi. Mashina 0 dan 100 km/soat tezlikka 4,5 soniyada chiqadi.
Avtomobil ikki xil batareya variantiga ega. 18,4 kVt·soatli akkumulyator 100 kilometr, 41,5 kVt·soatli akkumulyator esa 210 kilometr elektr yurish masofasini ta’minlaydi.
Narxlar
| Model | Narx (yuan) | Narx (USD) |
|---|---|---|
| Geely Galaxy M9 2WD Start | 193,8 ming | $27 ming |
| Geely Galaxy M9 2WD Smart | 202,8 ming | $28 ming |
| Geely Galaxy M9 2WD Long-range | 209,8 ming | $29 ming |
| Geely Galaxy M9 2WD Long-range Smart | 217,8 ming | $30 ming |
| Geely Galaxy M9 2WD Explore | 236,8 ming | $33 ming |
| Geely Galaxy M9 4WD Pilot | 258,8 ming | $36 ming |
Eslatib o‘tamiz, Kursiv Uzbekistan Geely 5000 dollarlik yangi elektromobil taqdim etgani haqida yozgan edi.
