Huawei va Seres hamkorligida tashkil qilingan Aito brendi yangi elektromobilini namoyish qildi. Bu haqda CarNewsChina xabar bermoqda.
Ta’kidlanishicha, Huawei Aito M8 elektromobili HarmonyOS Smart Mobility Autumn New Product Launch Event tadbirida taqdim etildi. Yangi krossoverning narxi 359,8 ming yuandan ($50 ming) boshlanadi, maksimal komplektatsiyasi esa 449,8 ming yuanni ($62,5 ming) tashkil etadi. Modelda CATL kompaniyasi ishlab chiqargan 100 kVt·soatlik akkumulyator o‘rnatilgan bo‘lib, u 705 km CLTC yurish masofasini ta’minlaydi.
Aito M8 EV brendning oilaviy dizayniga mos ko‘rinishda bo‘lib, Nebula old optikasi va butun kenglikni egallagan orqa chiroq bilan jihozlangan. Aerodinamik qarshilik koeffitsienti esa atigi 0,255.
O‘lchamlari: uzunligi 5190 mm, eni 1999 mm, balandligi 1795 mm, g‘ildirak bazasi 3105 mm. Yerdan balandligi 220 mm, suvda yurish chuqurligi esa 700 mmgacha.
Salonida uch ekranli panel, kompressorli avtomobil sovutkich va 26 ta turli saqlash joyi mavjud. Texnologiyalar bo‘yicha Aito M8 EV Huawei intellektual boshqaruv tizimlari bilan ta’minlangan. Mashinada 192-qatorli LiDAR, yuqori aniqlikdagi orqa qattiq holatli LiDAR va besh 4D millimetr to‘lqinli radar o‘rnatilgan.
Narxlar:
| Modeli | Narxi (yuan) | Narxi (AQSh dollari) |
|---|---|---|
| Pure EV Max+ Long Range, 5 o‘rinli | 359 800 | $50 ming |
| Pure EV Max+ Long Range, 6 o‘rinli | 379 800 | $52,8 ming |
| Pure EV Max+ AWD, 5 o‘rinli | 379 800 | $52,8 ming |
| Pure EV Max+ AWD, 6 o‘rinli | 399 800 | $55,6 ming |
| Pure EV Ultra AWD, 5 o‘rinli | 429 800 | $59,7 ming |
| Pure EV Ultra AWD, 6 o‘rinli | 449 800 | $62,5 ming |
Eslatib o‘tamiz, Kursiv Uzbekistan Chery va Huawei hamkorligida ishlab chiqilgan yangi elektromobil taqdim etilgani haqida yozgan edi.
