Xitoyning Xpeng kompaniyasi tomonidan yangi Xpeng P7 elektromobili sotuvga chiqarildi. Bu haqda CarNewsChina xabar bermoqda.
Yangi P7 Xmart Face dizayn tilida ishlab chiqilgan. Old qismida ingichka LED chiroq va yoritiladigan Xpeng logosi joylashgan. Aktive aerodinamik tizimda yopiladigan havo kirish teshigi va orqa spoiler mashinaga 0,201 Cd havo qarshilik koeffitsientini beradi.
Model 20 yoki 21 dyuymli disklar, shuningdek, qaychi eshiklar va Brembo tormozlari bilan jihozlanadi. O‘lchamlari: 5017×1970×1427 mm, g‘ildirak bazasi 3008 mmni tashkil etadi.
Ichki makon uch xil rangda: to‘q kulrang, och kulrang va binafsha. 15,6 dyuymli ekran burilib ishlaydi, 8,8 dyuymli panel va 87 dyuymli AR HUD displey bilan to‘ldirilgan. 23 dinamikli 7.1.4 audio tizim, 575 litr hajmli bagaj (orqa o‘rindiqlar bukilganda 1929 litr) mavjud. Old o‘rindiqlar 16 yo‘nalishda sozlanadi, massaj, isitish va ventilyatsiya funksiyalari bor.
Narxlar:
| Model nomi | Narx (yuan) | Narx (USD) |
|---|---|---|
| Xpeng P7 720 | 219,800 | $30,7 ming |
| Xpeng P7 820 | 239,800 | $33,5 ming |
| Xpeng P7 750 AWD | 259,800 | $36,3 ming |
| Xpeng P7 750 AWD Scissor Doors | 301,800 | $42,1 ming |
Xpeng P7 800 voltli elektr tizim bilan jihozlangan. Orqa g‘ildirakdan harakatlanuvchi versiyasi 270 kW (362 ot kuchi) quvvatga ega. To‘liq g‘ildirakli versiyasi esa 437 kW (586 ot kuchi) ishlab chiqaradi va 0 dan 100 km/soat tezlikka atigi 3,7 soniyada chiqadi. Model uchun ikki xil batareya varianti taklif etiladi: 74,9 kVt·soat LFP va 92,2 kVt·soat NMC, ular avtomobilga 702–820 km (CLTC standarti bo‘yicha) masofa bosib o‘tish imkonini beradi.
Eslatib o‘tamiz, Kursiv Uzbekistan nashri yangilangan Xpeng P7’ning suratlari tarqalgani haqida yozgan edi.
