Chendu avtosaloni arafasida Voyah kompaniyasi yangilangan Voyah Courage elektromobilini taqdim etdi. Bu haqda CarNewsChina xabar bermoqda.
Model uch xil versiyada ishlab chiqariladi. Uning narxi esa 202,9 ming yuandan ($28,2 ming) boshlanib, eng yuqori komplektatsiya uchun 242,9 ming yuan ($33,8 ming)ni tashkil etadi.
Avtomobil ilg‘or 800V platforma asosida yaratilgan. U 5C tezkor quvvatlashni, Huawei Qiankun ADS 4 aqlli haydash tizimini va HarmonySpace 5 aqlli kokpitini qo‘llab-quvvatlaydi.
Yangilangan Courage old panelida 46,75 dyuymli yorug‘lik displeyi bilan ajralib turadi. Bu tizim kirish-chiqish animatsiyalari, quvvatlash jarayoni, musiqaga mos yorug‘lik tizimi kabi 8 ta tayyor rejimni taklif qiladi.
Uning o‘lchamlari uzunligi 4810 mm, kengligi 1900 mm, balandligi 1636 mmga teng. G‘ildirak bazasi esa 2925 mm. Yon qismi yashirin B, C va D ustunlari bilan silliq va dinamik ko‘rinishga ega.
Salon zamonaviy texnologiyalar jihozlangan. 10,25 dyuymli LCD panel, AR-HUD proyeksiya, 15,6 dyuymli sensorli ekran (Snapdragon 8295P chipi bilan). Shuningdek, 35 ta saqlash bo‘limi, 72 litrli yashirin joy, 7 litrli issiq/sovuq sovitkich, Voyah Sound audio tizimi, simsiz zaryadlash, orqa yo‘lovchilar uchun stolchalar va OEKO-TEX sertifikatli ekologik qoplamalar mavjud.
Eslatib o‘tamiz, Kursiv Uzbekistan Voyah Free+ yangi modeli taqdim etilgani haqida yozgan edi. Unga ko‘ra, endi u benzinli mashinaga o‘xshashroq bo‘lib, uzatmalar qutisi tovushini va taxometr ko‘rsatkichini simulyatsiya qiladi. Avtomobil 29 dyuymli proektsion ekran, Huawei ADS 4.0 tizimi va HarmonyOS Cockpit 5 bilan jihozlangan.
