Bugun, 29-avgust kuni soat 06:19 dan 09:53 gacha license.gov.uz axborot tizimida texnik nosozlik yuzaga kelgan. Shu sababli, ayrim nodavlat oliy ta’lim tashkilotlarining amaldagi litsenziyalariga o‘zgartirish kiritish haqidagi so‘rovlari bo‘yicha tizim tomonidan noto‘g‘ri ijobiy xulosalar shakllantirilgan.
Oliy ta’lim, fan va innovatsiyalar vazirligi mazkur holat texnik xatolik bo‘lib, hozirda uning sabablari tegishli idoralar bilan hamkorlikda chuqur o‘rganilayotganini ma’lum qildi.
Shu bilan birga, vazirlik quyidagi ta’lim tashkilotlariga yangi ta’lim yo‘nalishlari, mutaxassisliklar, ta’lim shakllari va faoliyat manzillari bo‘yicha qabul jarayonlarini tashkil etish uchun hech qanday ruxsat berilmaganini ta’kidladi:
- «University of business and science» MChJ — masofaviy ta’lim shakllariga;
- «Osiyo xalqaro universiteti» MChJ — masofaviy ta’lim shakllariga hamda Xorazm viloyati, Urganch shahridagi yangi faoliyat manziliga;
- «Iqtisodiyot va pedagogika universiteti» NTM — tibbiyot yo‘nalishlari, magistratura mutaxassisliklari, masofaviy ta’lim shakllari hamda Surxondaryo viloyatining Denov tumanidagi yangi faoliyat manziliga;
- «Sharq-university» MChJ — bank ishi, buxgalteriya hisobi ta’lim yo‘nalishlari, shuningdek, barcha kechki va masofaviy shakllarga;
- «Profi university» MChJ — yurisprudensiya ta’lim yo‘nalishi, masofaviy shakl va barcha magistratura mutaxassisliklariga.
Shu sababli, mazkur tashkilotlar tomonidan yuqoridagi yo‘nalishlar va shakllar bo‘yicha berilayotgan e’lonlar asossiz hisoblanadi.
2025/2026-o‘quv yilida oliy ta’lim muassasalari bakalavriatining masofaviy ta’lim shakliga 18 195, kechki ta’lim shakliga esa 28 732, magistratura bo‘yicha masofaviyga 420, kechki 1 319 ta qabul kvotasi tasdiqlangan.
Bundan tashqari, joriy o‘quv yilidan boshlab prezident farmoniga asosan O‘zbekistonda sirtqi ta’lim shakliga qabul to‘xtatildi. Shu bilan birga, kunduzgi ta’limdan boshqa muqobil ta’lim shakllari uchun qabul kvotalari bosqichma-bosqich oshirib boriladi.
Oliy ta’lim muassasalarida kredit-modul tizimiga asoslangan part-time (ma’qullashtirilgan kunduzgi) ta’lim shakli joriy qilinadi. Muqobil shakllarda talaba qabul qilish belgilangan normadan oshsa, bu litsenziya talablarini buzish deb hisoblanadi va litsenziya bekor qilinishi mumkin.
Shuningdek, oliy pedagogik ta’lim yo‘nalishida nodavlat ta’lim xizmatlarini litsenziyalash endilikda Maktabgacha va maktab ta’limi vazirligi xulosasi asosida amalga oshiriladi.
